Tuesday, October 6, 2015

လင်းခါးရဲ့ ​ဖြောင့်​ချက်​​များ

လင်းခါးရဲ့ ဖြောင့်ချက်များ

စာအုပ်အမည် - ခေတ်က ရိုက်စစ်တော့ ကဗျာတွေ ထွက်လာတယ်
ရေးသူ - လင်းခါး
ထုတ်ဝေသည့်ကာလ - မေ၊ ၂၀၁၅
ထုတ်ဝေသည့်တိုက် - ဗောဓိရိပ် အနုပညာ
မျက်နှာဖုံးဒီဇိုင်း - နှနှင်းနွယ်ဖြိုး


 ၂၀၁၅၊ မေလမှာ ကဗျာဆရာလင်းခါးရဲ့ တတိယမြောက်တစ်ကိုယ်တော်အဖြစ်`ခေတ်က ရိုက်စစ်တော့ ကဗျာတွေ ထွက်လာတယ်´ လို့ ခေါင်းစဉ်ပေးထားတဲ့ ကဗျာစာအုပ်တစ်အုပ်ထွက်လာပါတယ်။ ၂၀၁၁ ဖေဖော်ဝါရီမှာ `ယှဉ်ရုန်းခဲ့တဲ့ ဘော်ဒီ´၊ ၂၀၁၂ ဇူလိုင် မှာ `စိမ်းဖန့်နေတဲ့ စိမ်းကားရက်စက်မှု´ ဆိုပြီး တစ်ကိုယ်တော်ကဗျာစာအုပ် ၂ အုပ်ထွက်ရှိ ထားခဲ့ပြီး အရင်စာအုပ်တွေနဲ့ ကွဲပြားတာကတော့ အခု ကဗျာစာအုပ်ဟာ ခေတ်စနစ်တစ်ခုရဲ့ စစ်ကြောရေးစခန်းက ရိုက်နှက် စစ်ဆေး လို့ ထွက်ကျလာတဲ့ ဖြောင့်ချက်တွေကို ကဗျာအဖြစ် စုစည်းထုတ်ဝေထားခြင်းဖြစ်ပါတယ်။ တစ်နည်းပြောရရင် အာဏာရှင် စစ်အစိုးရလက်အောက်က လူငယ်တစ်ယောက်ရဲ့ပေါက်ကွဲမှု၊ တရားဖိနှိပ်ခံရမှုများအပေါ် စကားလုံးများဖြင့် တုံ့ပြန်မှု၊ ခေတ် စနစ်ဆိုးတစ်ခုအောက်ကနေ ကဗျာဖြင့် တွန်းကန်ရုန်းထွက်မှု၊ ကောင်းမွန်သော အနာဂတ်အတွက် စာပေနဲ့ တိုက်ပွဲဝင်မှု များပဲ ဖြစ်ပါတယ်။ လင်းခါးရဲ့ ဒီစာအုပ်မှာ ဆရာမောင်မှိုင်းလွင်(အင်းဝ)နဲ့ ရဲဘော်သံခဲ မကဒတ(ကျောင်းသားတပ်မတော်) တို့က အမှာစာရေးပေးထားပြီး သူ့ရဲ့ ပထမဆုံးကဗျာစုစည်းမှုဖြစ်တဲ့ `ယှဉ်ရုန်းခဲ့တဲ့ဘော်ဒီ´ ကဗျာစာအုပ်မှာ မဖော်ပြဖြစ် လိုက်တဲ့ ဆရာနေမျိုးရဲ့ အမှာစာကိုလည်း ပြန်လည်ထည့်သွင်းထားပါသေးတယ်။ ဒီနေရာမှာ ဆရာမောင်မှိုင်းလွင်(အင်းဝ) ရဲ့ အမှာစာကို အနည်းငယ် ပြန်ဖော်ပြချင်မိပါတယ်။

`ဗမာပြည်မှာတော့ ဆရာကြီးသခင်ကိုယ်တော်မှိုင်းဟာ သူ့ခေတ် သူ့အခါ အလျောက်လေးချိုးကြီးဆိုတဲ့ ကဗျာ ပုံ သဏ္ဍာန်အသစ်၊ ဋီကာ၊ ကဏ္ဍိ စတဲ့ စကားပြေပုံသဏ္ဍာန်အသစ်တွေကို တီထွင်ပြီး ပြည်သူ့စာပေ၊ စာပေသစ်၊ လမ်းကြောင်း ကို စတင်လမ်းဖောက် လျှောက် လှမ်းခဲ့သူ ဖြစ်ပါတယ်။ စာပေသစ်ရဲ့ ခေါင်းဆောင်ဟာ ဆရာကြီးပါ။ ဆရာကြီးရဲ့ စာပေသစ် သဘောတရားကို ဆရာ ဒဂုန်တာရာက တာရာမဂ္ဂဇင်းယာဉ်သာနဲ့ တင်ဆောင်ကာ ဆက်လက်ဖြန့်ချိ ပြန့်ပွား စေခဲ့ပါတယ်။ နောက် . . . အတွေးရဲ အရေးရဲတဲ့ မန္တလေးတက္ကသိုလ်ကလောင်ရှင်များ။ ပြီး . . . မိုးဝေကဗျာခေတ်၊ စာကူးစက် ကဗျာခေတ်။ ရှစ်လေးလုံး အရေးတော်ပုံကာလအပြီးမှာတော့ ဒုတိယမှိုင်းလို့ တင်စားခံရတဲ့ ဆရာတင်မိုးခေတ်။ အဲဒီကနေ လွတ်လပ်လင်္ကာ တော်လှန်ကဗျာခေတ်ဟာ ကနေ့လူငယ်တွေအထိ ဆက်လက်ကိုင်စွဲ သယ်ဆောင်ခဲ့ကြတော့တာပါပဲ။´
ဆက်လက်ပြီး ဆရာမောင်မှိုင်းလွင်(အင်းဝ)က `လင်းခါးဟာ သူဖြတ်သန်းနေရတဲ့သမိုင်းခေတ်ကို မျက်ခြေမပြတ်၊ တွေးအားကောင်း ရေးအားကောင်းသူ။ ကဗျာလူငယ်ဟာ ပေါ်ပင်ပုံသဏ္ဍာန်နောက်ကို မလိုက်၊ အကြောင်းအရာကိုသာ အဓိက ဖက်တွယ်တယ်။ ကာရံအပေါ်မှာ ပေါ့ပါးတယ် ထင်စရာရှိပေမယ့် အဘိဓမ္မအပေါ်မှာတော့ လေးနက်တယ်။ လင်းခါး ရဲ့ ကဗျာဖန်သားပြင်မှာ သူဖြတ်သန်းရတဲ့ သမိုင်းခေတ်ကြီး ကတော့ ပြတ်ပြတ်သားသား၊ ထင်ထင်ရှားရှား။ လင်းခါးဟာ သမိုင်းရဲ့ မျက်လုံးနဲ့ စူးစူးရှရှမြင်တတ်သူ၊ သမိုင်းရဲ့ နားနဲ့ ပီပီမြည်မြည်ကြားတတ်သူ၊ သမိုင်းရဲ့ ဦးဏှောက်နဲ့ ရဲရင့် ထက်မြတ် တွေးတတ်သူ၊ သမိုင်းရဲ့စာမျက်နှာမှာ ရေးအား ကောင်းကောင်းနဲ့ ဖွဲ့နွဲ့တတ်သူ၊ ပြည်သူ့ဘ၀ ပြည်သူနှလုံးသား ပြည်သူ့ ခံစားချက်တွေနဲ့ ထုံမွှန်းထားတဲ့ ရင်ထဲက စကားကို သူသိစေချင်တဲ့ သူတွေ ရှင်းရှင်းလင်းလင်းနားလည်သွားအောင် လှလှပပ ပြောပြတတ်သူ´ လို့လည်း ရေးပေးထားပါတယ်။

၁၉၄၈ လွတ်လပ်ရေးရပြီးနောက်ပိုင်း ဗမာပြည်ဟာ ပြည်တွင်းစစ်နဲ့ စတင်ကြုံတွေ့ခဲ့ရတယ်။ အဲဒီနောက်ပိုင်း၁၉၆၂ မှာ ပြည်တွင်းဖြစ်ဆိုရှယ်လစ်အယောင်ဆောင်စစ်အုပ်စုရဲ့ အာဏာသိမ်းမှုနဲ့အတူ ဗမာပြည်စာပေလွတ်လပ်ခွင့်ဟာ စတင် ဆုံးရှုံးခဲ့ရပြီး အဲဒီနောက်ပိုင်း ၇၄၊ ၇၅၊ ၇၆ စစ်အာဏာရှင်ဆန့်ကျင်ရေးလှုပ်ရှားမှု၊ အကြီးကျယ်ဆုံးသော ရှစ်လေးလုံး အရေး အခင်းကြီး နောက်ပိုင်း ပိုမိုဆိုးရွားစွာ စာပေလွတ်လွတ်ခွင့် ဆိုးဆိုးရွားရွားဆုံးရှုံးခဲ့ရပါတယ်။ ဥပမာ-`ည´ ဆိုတဲ့ စကားလုံး အသုံးပြုရင်တောင် သူတို့အုပ်ချုပ်နေတဲ့ခေတ်ကို အမှောင်ခေတ်လို့ ရည်ရွယ်ပြီး ရေးတာဆိုပြီး ဖော်ပြခွင့်မရရှိတာမျိုး၊ `ထောင်´ ဆိုရင် ဘ၀တက္ကသိုလ်တို့၊ ကျောင်းတော်ကြီးတို့ ရေးရတာမျိုး စတဲ့ အုပ်ချုပ်သူအစိုးရနဲ့ မလွတ်ကင်းတဲ့ ကဗျာ တွေ၊ စာတွေဆိုရင် စုတ်ဖြဲခံရ၊ ငွေမှင်အသုတ်ခံခဲ့ကြရပေမယ့် ကဗျာဆရာတွေဟာ ခေတ်ပေါ်ကဗျာအားကောင်း ဖြစ်ထွန်း လာမှုနဲ့အတူ သင်္ကေတ၊ နမိတ်ပုံ၊ သွယ်ဝိုက်တဲ့ စကားလုံးတွေနဲ့ ခေတ်အဆက်ဆက် ဆန့်ကျင်ရေးသား တိုက်ပွဲဝင်ခဲ့ကြပါ တယ်။ အခု ဒီဘက်နှစ်များ ၂၀၁၂ နှောင်းပိုင်းမှာ စာပေလွတ်လပ်ခွင့်အနည်းငယ် ပြန်ပေးလာပါတယ်။ လွတ်လပ်ခွင့် အနည်းငယ် ရလာတဲ့အလျောက်လည်း ကဗျာဆရာတွေက သွေးတိုးစမ်းရေးကြတယ်။ ပိုမို တိုက်ရိုက်ဆန့်ကျင်ပြီး ရေး ကြည့်တယ်။ ခေတ်ကာလနဲ့ ကဗျာအရွေ့အရလည်း ပင်မရေစီးခေတ်ပေါ်ကဗျာဟာ အရင်ကထက် အလင်္ကာတွေ နိမိတ်ပုံ တွေ လျော့ရေးလာကြတာလည်း ပါတယ်။ ခေတ်ပေါ်/ခေတ်ပြိုင်ကဗျာဟန် ရောထွေးမှုတွေ၊ ကဗျာဆိုင်ရာနည်းနာ အသစ် တွေ ပေါ်လာတယ်။ ဘယ်လိုပဲ ကဗျာဟန်တွေ ပြောင်းလဲသွားပါစေ၊ အကြောင်းအရာတွေ ပြောင်းလဲနေပါစေ။ ပြည်သူ အလိုမရှိတဲ့၊ ပြည်သူကို မတရားဖိနှိပ်တဲ့ အစိုးရရှိနေသရွေ့၊ ပြည်သူလိုလားတဲ့ ခေါင်းဆောင်မအုပ်ချုပ်သရွေ့တော့ ပြည်သူ့ အတွက်ဆိုတဲ့ ကဗျာတွေက ရှိနေဦးမှာပဲ ဖြစ်ပါတယ်။

လင်းခါးကို ခုနှစ်မှ၁၉၈၆ခုနှစ်မှာ မွေးတယ်။ ပထမဆုံးပုံနှိပ်ကဗျာ ဖော်ပြခံရတော့ ၂၀၀၄ ခုနှစ်။ လင်းခါးဟာ ခုချိန်ထိ ခေတ်ပေါ်ကဗျာဟန်ကို ကိုင်စွဲထားတဲ့ ကဗျာဆရာတစ်ယောက်ဖြစ်တယ်။ ၁၉၇၀ ကို ခေတ်ပေါ်ကဗျာ ပထမမျိုးဆက်၊ ၁၉၉၀ ကို ခေတ်ပေါ်ကဗျာ ဒုတိယမျိုးဆက်လို့ သတ်မှတ်ရင် လင်းခါးဟာ ခေတ်ပေါ်ကဗျာကို လက်ဆင့်ကမ်း သယ်ဆောင် နေတဲ့ တတိယမျိုးဆက် အဖြစ် သတ်မှတ်ရမယ် ထင်ပါတယ်။ လင်းခါးရဲ့ ကဗျာအများစုဟာ ဒီနေ့ နိုင်ငံရေးအဖြစ်အပျက် တွေအပေါ်မှာ အခြေခံတယ်။ လင်းခါးဟာ ကဗျာတစ်ပုဒ်တည်ဆောက်ရာမှာ သူ့ကိုယ်သူ ဗဟိုပြုရေးသားတယ်။ ကဗျာထဲမှာ ရေးဖွဲ့သူ`ငါ/ လင်းခါး´ ကို မြင်နိုင်တယ်။ နိုင်ငံအရေးဟာ သူ့ကဗျာတွေ အပေါ်မှာ အထင်းသား မြင်နေရတယ်။ တောင်သူ လယ်သမားဦးကြီးတွေရဲ့ လယ်ယာမြေသိမ်းခံကိစ္စ၊ ပြည်တွင်းစစ်နဲ့ ဗန်းပြငြိမ်းချမ်းရေးစားပွဲဝိုင်းများ၊ လူ့အခွင့်အရေး ဖိနှိပ်ခံ ရမှု၊ အခွန်ကိစ္စ၊ လွှတ်တော်ထဲက ဟာသပြက်လုံးတွေ၊ ဖျောက်ဖျက်ခံရတဲ့ သမိုင်းတွေ၊ စစ်ဘေးဒုက္ခသည် ကလေးငယ် တွေ၊ အကျင့်ပျက် ခြစားမှုနဲ့ ရောင်းစားခံနေရတဲ့ သဘာဝသယံဇာတတွေ၊ ဖြိုခွဲခံခဲ့ရတဲ့ ကျောင်းသား အရေးအခင်းတွေ စတဲ့ အကြောင်းအရာတွေဟာ လင်းခါးရဲ့စိတ်မှာ လာလာစူးနေတဲ့ဆူးညှောင့်တွေပါပဲ။ တောင်သူဦးကြီးတစ်ယောက်ရဲ့ လယ်မြေ အသိမ်းခံရတာ လင်းခါးရဲ့ လယ်မြေအသိမ်းခံရသလိုပဲ။ လူ့အခွင့်အရေးနဲ့ မီဒီယာဖိနှိပ်ခံရမှုတွေဟာ လင်းခါးကိုယ်တိုင် ဖိနှိပ် ခံရသလိုပဲ။ တိုင်းပြည်သယံဇာတတွေ ဆုံးရှုံးတာ သူ့သယံဇာတဆုံးရှုံးတာပဲ။ ကျောင်းသားသပိတ် ဖြိုခွဲခံရတာ သူ့ကိုယ်တိုင် အဖြိုခွဲခံရသလိုပဲ။ သူ နာကျင်တယ်။ သူ ဒေါသထွက်တယ်။ သူ ပေါက်ကွဲတယ်။ ပြည်သူ့အရေးဟာ သူ့အရေးပဲ။ ပြည်သူ့ နာကျင်မှုဟာ သူ့နာကျင်မှုပဲ။ ဒါတွေကို လင်းခါးက သူအားသန်တဲ့ အဘိဓမ္မာအားကောင်းကောင်းနဲ့ ရေးဖွဲ့တယ်။ သူနှစ် သက်တဲ့ ခေတ်ပေါ်ကဗျာဟန်နဲ့ တင်ပြတယ်။ လင်းခါးဟာ သူယုံကြည်တဲ့ နိုင်ငံရေးသိမှုကို ကဗျာထဲမှာ ထည့်ပြော တယ်။ ခေတ်ပေါ်ကဗျာဟန်ဟာ သူ့ကိုင်စွဲထားတဲ့ လက်နက်ပဲ။ သူဟာ ကဗျာထဲမှာ အကြောင်းအရာကို တိုက်ရိုက် ထည့်ရေးလိုက်၊ သွယ်ဝိုက်ရေးသားလိုက်နဲ့ အာဏာရှင်လူတစ်စုရဲ့ ဖိနှိပ်မှုကို မဂ္ဂဇင်းစာမျက်နှာတွေပေါ်ကနေ ဆန့်ကျင် တယ်။
 `နှစ်ငါးဆယ် ရှင်းတမ်း´ကဗျာမှာဆိုရင် လင်းခါးဟာ ရုန်းကန်နေရတဲ့ လယ်သမားတွေရဲ့ ကြမ်းတမ်းတဲ့ဘ၀ကို ဖွဲ့တယ်။ ကောက်ပဲသီးနှံမဖြစ်ထွန်းလို့ မလှူနိုင် မတမ်းနိုင်ရုံမက စားစရာတောင် မလောင်ငတော့တဲ့ ကျေးလက်ဘ၀ကို ဖွဲ့တယ်။ ကလေးစားပွဲထိုးနဲ့ ညဘက်လိင်အလုပ်သမလေးအကြောင်းကို ဖွဲ့တယ်။ ဖိအားနှစ်ငါးဆယ်အောက်မှာ နားတွေ အူပြီး မျက်လုံးတွေတောင် ပြူးထွက်လာကုန်တယ် တဲ့။ အဆုံးသတ်အပိုဒ်ကို ဖတ်ကြည့်ပါ။ လင်းခါးရဲ့ တိုက်ရိုက်ရေးဖွဲ့ပုံ။

ဟုတ်ပါပြီ
အဆိုးသိပ်မြင်တာပဲ
ကြည့်ပါ နေ၀န်းက အရှေ့က ထွက်တုန်းပဲ
နှစ်ငါးဆယ်ရဲ့ ဒီဘက်နေ့တွေဟာ
နှစ်ငါးဆယ်ရဲ့ ဟိုဘက်နေ့တွေလို မဟုတ်တော့ဘဲ။
နှစ်ငါးဆယ်ရဲ့ ဒီဘက်နေ့တွေဟာ
နှစ်ငါးဆယ်ရဲ့ ဟိုဘက်နေ့တွေနဲ့ ဘာမှ မဆိုင်တော့ဘူး
ချေးစားပြောရင်တောင် ကြိုက်လို့ပဲ ထင်တယ်။
(နှစ်ငါးဆယ် ရှင်းတမ်း ကဗျာမှ)

 နောက်ထပ် လင်းခါးရဲ့ ဒီလို တိုက်ရိုက်ဆန့်ကျင်အဖွဲ့တွေကို `ဟာသ နိုင်ငံတော်´၊ `ရှေ့ထွက်မင်းသား´၊` သမိုင်း ကို ဘယ်လိုရေးရမယ်´၊ `ဒီနိုင်ငံမှာ´၊` ပြည်သူအသံ´၊ `ယူနီဖောင်းကြီးနဲ့ ဆိုတော့´၊ ` ခွေးမလုပ်တာတွေ´၊ `ငရဲခွေးမို့ ရဲဆေးတင်ဖို့ မလို´ စတဲ့ ကဗျာတွေမှာ ဆက်တိုက် တွေ့ရပါတယ်။ ၂၀၁၂ ရှေ့ပိုင်းနှစ်များမှာ ဘယ်လိုနည်းနဲ့မှ ပုံနှိပ်ခွင့် မရနိုင်တဲ့ ကဗျာတွေပါပဲ။ လင်းခါးအနေနဲ့ ကံကောင်းတာက ကျွန်တော်တို့ ဒီဘက်နှစ်များမှာ Facebook Social Network ပေါ် လွတ်လွတ်လပ်လပ် ရေးလို့ရလာပြီ။ ကိုယ့်အယူအဆနဲ့ကိုယ် တိုက်ရိုက်ဝေဖန်ပိုင်ခွင့်ရှိလာပြီ။ ကိုယ်တတ်နိုင်ရင် စာပေ စီစစ်ရေးတင်စရာမလိုပဲ ကဗျာစာအုပ်တွေ တိုက်ရိုက်ထုတ်လာနိုင်ပြီ။ ကိုယ်ကြိုက်တဲ့ ကိုယ်ရေးတဲ့ကဗျာကို ဘယ်သူ အဖြုတ်အတပ်၊ အစစ်အဆေးခံစရာမလိုဘဲ ထည့်သွင်းပုံနှိပ်လာနိုင်ပြီ။ ဒါဟာ နှစ်ငါးဆယ်ဒီဘက်နှစ်များမှာ အဆိုးထဲက အကောင်းလို့ပဲ ခေါ်မလား။ ကြိုးရှည်ရှည်နဲ့ လှန်ထားခြင်းပဲလား။ မင်းတို့လည်း ရေးချင်ရာရေး ငါတို့လည်း လုပ်ချင်ရာ လုပ်မယ်ဆိုတဲ့ အချိုးမျိုးပဲလားတော့ မသိ။ ကဗျာတွေကတော့ ပက်ကွီအိုရဲ့ လက်သီးချက်တွေလို တစ်ချက်ထိတာနှင့်ပင် မှောက်ရက်လဲကျသွားနိုင်တဲ့ ကဗျာတွေ။ ရှက်တတ်ရင် ဖတ်နေတဲ့ နေရာမှာပဲ လဲသေသွားနိုင်တဲ့ ကဗျာတွေ။

ယူနီဖောင်းတွေဟာ
နေရာယူတယ် လာဘ်ယူတယ် အာဏာယူတယ်
မတရားသဖြင့် ယူတယ်
ရနိုင်သလောက် ယူတယ်
ဓားပြတိုက် ယူတယ်
လိုအပ်အပ် မလိုအပ်အပ်
ယူနီဖောင်းတွေက ယူတော့တာပပဲ

ယူနီဖောင်းဟာ ဆူဖာပေါ် မြုပ်ဝင်
ယူနီဖောင်းဟာ ခါးကြားမှာ ဗျောက်နဲ့
ယူနီဖောင်းဟာ မိန့်ခွန်းကို မပြောချင်ပြောချင်နဲ့ပြော
ယူနီဖောင်းဟာ ယူနီဖောင်းနဲ့ဆိုတော့ ၀ပ်ဆင်းသွားတာပဲ

ကမ္ဘာဦးလူသားတွေ
နေလုံးကြီးက တောက်ပလွန်းတော့ ကြောက်ရသလို
ယူနီဖောင်းကြီးက ခြောက်ပြနေတော့ ကြောက်ရတယ်။
(ယူနီဖောင်းကြီးနဲ့ဆိုတော့ ကဗျာမှ)

ခွေးဟာ
ပြည်ထောင်စုကြီး ပြိုကွဲတော့မယ်ဆိုပြီး
အာဏာမသိမ်း။
ခွေးဟာ လူမသတ်
ခွေးဟာ
အယောင်ဆောင် ဆိုရှယ်လစ်လူ့ဘောင်မပြော။
ခွေးဟာ
လူ့အခွင့်အရေးမချိုးဖောက်
ခွေးဟာ
သေနတ်တရမ်းရမ်းမလုပ်
ခွေးဟာ
တိုင်းပြည်ကို ဇွတ်မကယ်တင်။
(ခွေးမလုပ်တာတွေ ကဗျာမှ)

 လင်းခါးဟာ သူ့ကဗျာတွေရဲ့ အကြောင်းအရာအပေါ်မှာ လိုက်ပြီး ကဗျာထဲမှာ ထည့်သွင်းဖွဲ့စပ်ထားတဲ့ ပြောသူ လေသံကို အပြောင်းအလဲလုပ်ပါတယ်။ အထက်က ကဗျာတွေမှာ လင်းခါးရဲ့ လူငယ်စိတ်နဲ့ ပေါက်ကွဲထွက်လာတဲ့ ဒေါသသံ တွေဟာ `ကျောမွဲ´၊ `အိပ်ပါစေ´၊`ဟိုဘက်အိမ်က မိနီ´၊`ကျမ မောင်လေး´ဆိုတဲ့ ကဗျာတွေမှာတော့ လင်းခါးရဲ့အသံဟာ စာနာစိတ်အပြည့် နူးညံ့ သိမ်မွေ့နေခဲ့ပါတယ်။
`ကျောမွဲ´ ကဗျာမှာ ပင်ပန်းဆင်းရဲမှု၊ လုပ်ခလစားနည်းပါးမှု၊ ကျန်းမားရေးစရိတ်မပြည့်စုံမှု၊ သားသမီးပညာရေး စရိတ်မပံ့ပိုးနိုင်မှု၊ သားသမီးအနာဂတ်လှပဖို့ မထောက်ပံ့နိုင်မှုအပေါ် ရိုးအတဲ့ အခြေခံလူတန်းစားလုပ်သားတစ်ယောက်ရဲ့ တုံ့ပြန်မှုဟာ နံရံကို လက်သီးနဲ့ ထိုးဖို့၊ ကျလာတဲ့ မျက်ရည်သုတ်ဖို့၊ ဗိုက်ဆာရင် ရေနှစ်ခွက်ဆင့်သောက်ဖို့နဲ့ ဒေါသထွက် လာရင် ဓနိမိုးကို မျက်စောင်းထိုး၊ သစ်ရွက်ခြောက်ပေါ် တံတွေးနဲ့ထွေး၊ တာရာဖိနပ်ပါးနဲ့ နှီးခြင်းတောင်းကို ပစ်ကန် ထည့်လိုက်တာပါပဲလို့ ရေးထားတယ်။ ရိုးတဲ့ အတဲ့ ကိုကျောမွဲဟာ သူ့တို့လုပ်အားတွေအပေါ်မှာ အမြတ်ထုတ်ကြီးပွားနေတဲ့ အရင်းရှင်တွေကို တော်လှန်ရကောင်းမှန်းမသိဘူး။ သူ့ဆန္ဒတွေ ဖော်ထုတ်ရကောင်းမှန်းမသိဘူး။ ဒါမှမဟုတ် သိခဲ့လို့ တော် လှန်ရင် ထောင်နံရံသံတိုင်ကြားရောက်သွားမယ်ဆိုတာ ကြိုတွေး မိလို့လား။ ကိုကျောမွဲဟာ ရိုးအတယ်။ ကဗျာဖတ်သူဟာ ကိုကျောမွဲကိုယ်စား နာကျင်ခဲ့ရတယ်။
`အိပ်ပါစေ´ နဲ့ `ကျမမောင်လေး´ကဗျာမှာလည်း ဒီအတိုင်းပါပဲ။ လင်းခါးဟာ ကျွန်တော်တို့ကို ကဗျာဖတ်ပြီး ကြေကွဲစေပါတယ်။ `အိပ်ပါစေ´မှာ ပြည်တွင်းစစ်ဘေးဒဏ်ကြောင့် ပြေးလွှားပုန်းအောင်းနေရတဲ့ ကလေးတစ်ယောက်ရဲ့ အိပ်စက်နေမှုကို နွေးထွေးကာကွယ်ပေးရင်း မြို့ကြီးပြကြီးက ခရိုနီလူတန်းစားတစ်ယောက်နဲ့ စကားပြောနေသလို ကဗျာကို ဖွဲ့ပြီး `ကျမမောင်လေး´ကဗျာမှာ စစ်ကြောရေးတစ်ခုက ပြန်ရောက်လာတဲ့ မောင်လေးတစ်ယောက်ရဲ့ သေခြင်းတရားကို အစ်မဖြစ်သူရဲ့ နာကျင်ကြေကွဲမှုအပြောတွေနဲ့ ရက်ရက်စက်စက် ဖွဲ့ပါတယ်။ နောက်ထပ်နှစ်သက်မိတဲ့ ကဗျာတွေကတော့ `မိသားစု´၊`လူတန်းစားပြဿနာနဲ့အနုပညာ´၊`သမီးလေးအတွက် ဖေဖေ့ကဗျာ´။

အစ်ကိုက အောင်မြင်တဲ့တစ်နေ့ ပြန်လာမယ် တဲ့
၁၂ နှစ် ရှိပြီ
စတိုးဆိုင်အခန်းကျဉ်းထဲမှာ
ဆယ်တန်းမအောင်တဲ့ အရောင်းစာရေးမလေး
အငေါက်ခံထိနေရှာ
အဲ့ဒါ ငါ့ ညီမလေးပေါ့
အဖေက လူရွှင်တော်
အမေအပါအ၀င် ငါတို့ မရယ်ရဘူး
(မိသားစု ကဗျာမှ)

သူ့အဖေက အထက်လွှာလူကြီး ပညာတတ်
ငါ့အဖေက အခြားအဆင့်နဲ့ စစ်မှုထမ်းဖူးတယ်
ဆိုက်ကားနင်းဖူးတယ်
အိမ်သာကျင်းတူးဖူးတယ်

သူ့အမေက သူ့အဖေယူလာတဲ့ ငွေတွေ
ဂုဏ်တွေ ကျော်စောကိတ္တိတွေကို
မီးခံသေတ္တာထဲ ထည့်ထည့်သိမ်းတယ်
ငါ့အမေက မူးပြီး လဲနေတဲ့ အဖေ့ကို တွဲခေါ်လာရတယ်
ချွေးတွေနဲ့ ပြန်လာတဲ့ အဖေ့ကို
မဲညစ်နေတဲ့ တဘက် ကမ်းဖူးတယ်
. . . .
. . . .
သူကြီးပြင်းလာရာ အခုတော့ ကဗျာဆရာ
ငါ ကြီးပြင်းလာရာ ငါလည်း ကဗျာဆရာ
သူ ဘာရေးမလဲ ငါ ဘာရေးမလဲ
`လူမှုရေးဘ၀က လူမှုရေးအသိကို ပြဋ္ဌာန်းတယ်´
(လူတန်းစားပြဿနာနဲ့ အနုပညာ ကဗျာမှ)

ဒါကြောင့် သမီးလေးရေ ဖေဖေ့လက်ဆောင်
ပိုးကိုက်သစ်သီးကြီးကို ပြုပြင်ပါ
မသိသားဆိုးဝါးတဲ့ ဒီလူ့အဖွဲ့အစည်းထဲမှာ
သမီးလေး တတ်နိုင်သလောက် အလင်းဖြန့်ဝေပါ
သမီးလေးရဲ့ ကြွယ်ဝမှုကို ဒီလူ့အဖွဲ့အစည်းအတွက် အသုံးချပါ
သမီးလေးအိပ်မက်ကို ဒီလူ့အဖွဲ့အစည်းမှာ ဖြန့်ဝေပါ
သမီးလေးအိပ်မက်ဟာ တရားမျှတမှုနဲ့ လတ်ဆတ်
အမှန်တရား အရည်ရွှမ်းတဲ့ အိပ်မက်ဖြစ်ပါစေကွယ်။
(သမီးလေးအတွက် ဖေဖေ့ကဗျာ မှ)

 လင်းခါးဟာ ဒီနေ့ခေတ် နိုင်ငံရေးအခင်းအကျင်းတွေကို စိတ်ဝင်စားတယ်။ ပြီးခဲ့တဲ့ နိုင်ငံရေးအခြေအနေကို ပြန်လေ့လာတယ်။ ဆန်းစစ်ဝေဖန်ပိုင်းခြားတယ်။ အမှန်အမှားကို ကိုယ်တိုင်သုံးသပ်တယ်။ သူယုံကြည်ရာနိုင်ငံရေးဆိုတာ သူ့ကဗျာထဲက ပြည်သူတွေရဲ့ နာကျင်ခံစားရမှုတွေကို ဖြေလျော့ရေးပဲ။ လင်းခါးကဗျာထဲက ဇာတ်ကောင်တွေဟာ အာဏာရှင်အစိုးရရဲ့ အုပ်ချုပ်ရေးယန္တရားအောက်မှာ အကြောက်တရားနဲ့ နေကြရတယ်။ `စစ်တပ်ဆိုတာ ဘယ်တော့မှ မိုးပေါ်ထောင်မပစ်ဘူး´ဆိုတဲ့ ရေဒီယို ထုတ်လွှင့်မှုအပြီးမှာ ကိုယ့်ဘ၀သက်တမ်းတစ်ဝက်ကို ထိုးကျွေးလိုက်ရတဲ့ IN TIME ရုပ်ရှင်ဇာတ်ကားထဲက သရုပ်ဆောင်တွေမျိုးပါပဲ။ ဒါတွေကို လင်းခါးက ကိုယ်တိုင်နာကျင်ခံစားရသလို ကဗျာဖွဲ့တယ်။ ဒါပေမယ့် သူလည်း မတတ်နိုင်ဘူး။ ဆုတောင်းရုံကလွဲလို့ ကဗျာဆရာ တတ်နိုင်တာ ကဗျာပဲ ရှိတာပေါ့။ လင်းခါးဟာ သမီးလေးရဲ့ အနာဂတ်အတွက် ဆုတောင်းပြီးတဲ့အခါ သူရှင်သန်နေထိုင်ရာ ကမ္ဘာမြေကြီးအတွက်၊ ငြိမ်းချမ်းရေး အတွက်`ကိုယ့်ကဗျာ´၊ `ကမ္ဘာကြီးအတွက် သီချင်း´ စတဲ့ကဗျာတွေနဲ့ `သိန်းသန်းအရေး ငြိမ်းချမ်းတေးကိုသာ ဆိုချင် ကချင် နားဆင်ချင်ပါတယ်လို့ ဆုတောင်းပေးလိုက်ပြန်တယ်။
 နောက်ဆုံးအနေနဲ့ ပြောရရင် လင်းခါးဟာ လူငယ်တစ်ယောက်ပါပဲ။ သူဖြတ်သန်းနေရတဲ့ ခေတ်ကြီးရဲ့ အဆီအငေါ် မတည့်မှုတွေ၊ နာကျင်ကြေကွဲမှုတွေ၊ ပိတ်ပင်တားဆီးမှုတွေ ကြုံလာရတဲ့အခါ ကဗျာဆိုတာနဲ့ သူပေါက်ကွဲတယ်။ ကဗျာ ဆိုတာနဲ့ သူ တော်လှန်တယ်။ သူ တော်လှန်ပေါက်ကွဲခဲ့တဲ့ကဗျာတွေဟာ တမင်လုပ်ယူထားတာမဟုတ်ဘူး။ သူ ခံစားမှု အစစ်အမှန်ဖြစ်တယ်ဆိုတာ သူ့လက်တွေ့ဖြတ်သန်းနေတဲ့ အနေအထား၊ သူရဲ့ နိုင်ငံရေးယုံကြည်ချက်နဲ့ သူ့ရဲ့ ရိုးသားမှုကို အခြေခံထားတဲ့ ကဗျာတွေက ပြသနေပါတယ်။ လင်းခါးလိုမျိုး ကဗျာဆရာတွေ ကျွန်တော်တို့ဆီမှာ အများကြီးရှိခဲ့ပါတယ်။ ရှိနေပါတယ်။ ရှိလာပါလိမ့်ဦးမယ်။ ခေတ်ဆိုး စနစ်ဆိုးနဲ့ ကြုံတဲ့အခါ ခေတ်က ရိုက်စစ်လို့ ထွက်ကျလာတဲ့ ကဗျာတွေလည်း အများကြီးရှိလာပါလိမ့်ဦးမယ်။ ကဗျာဆရာ လှသန်းက သူ့တို့မျိုးဆက်ကို `သုညမျိုးဆက်၊ ငါ ဒီလိုပဲ သတ်မှတ်ချင်တော့ တယ်´လို့ ရေးခဲ့ဖူးပါတယ်။ ကျွန်တော်ကတော့ ` သုညမျိုးဆက် အဆက်ဆက် ဥခွံဖောက်ထွက်နိုင်ပါစေ´လို့ပဲ ဆုတောင်း ရင်း လင်းခါးရဲ့ ဖြောင့်ချက်များအား မုဒိတာပွားလိုက်ရပါတယ်။

မင်းနဒီခ
၂၆၊ ၅၊ ၂၀၁၅

၂၀၁၅နဲ့ ဆက်​ကစားဦးမယ့်​ ကဗျာဆရာ

၂၀၁၅နဲ့ ဆက်​ကစားဦးမယ့်​ ကဗျာဆရာ

စာအုပ်အမည်           - ဆက်ကစားမယ် ပြန်ကွေ့ခဲ့ပါ
ရေးသူ                     - မောင်ကြည်သာ(တောင်တွင်း)၊ မောင်စိုးသစ်(မန္တလေး)
ထုတ်ဝေသည့်ကာလ   - အောက်တိုဘာ၊ ၂၀၁၅
ထုတ်ဝေသည့်တိုက်    - ကောင်းဇော် စာပေ


 ယနေ့ကဗျာခေတ်သည် မဂ္ဂဇင်းစာမျက်နှာထက် အွန်လိုင်းပေါ်တွင် ပိုမိုအားကောင်းလာသည်။ ခေတ်ပေါ်၊ ခေတ်ပြိုင် ကဗျာအရွေ့သည် အွန်လိုင်းစာမျက်နှာများပေါ်တွင် အရှိန်အဟုန်အားကောင်းစွာ ပြောင်းလဲရွေ့လျားနေသည်။ အွန်လိုင်းပေါ်တွင် နာရီပေါင်းများစွာ အချိန်ပေးနေရာယူထားသလောက် လူတစ်ဦးနှင့်တစ်ဦး ပြင်ပတွင် စကားပြောတွေ့ဆုံဖို့ အချိန်နည်းပါးလာသည်။ နည်းပညာ တိုးတက်မှုသည် လူမူဆက်ဆံရေးဝန်းကျင်တစ်ရပ်ကို ပြောင်းလဲသွားစေခဲ့ပြီ ဖြစ်သည်။ အထီးကျန်သည်ဟု ခံစားရသည့်အခါ အွန်လိုင်းစာမျက်နှာများကို ကြည့်ငေးရင်း တစ်ခါတရံတွင် အတိတ်ဆီက နန်းတော် ရှေ့ညများကို လွမ်းဆွတ်မိပါသည်။
ထိုစဉ်က နန်းရှေ့ဈေးရုံသစ်ကြီးအောက်မှာဖွင့်သည့် `သန်းတရာ´ ညအလင်းဆိုင် လက်ဖက်ရည်ဆိုင်လေးတွင် ညနေ ခြောက်နာရီ ဆိုလျှင် ဆရာမောင်ကြည်သာ(တောင်တွင်း) စောင့်နေလောက်ပြီ။ သိပ်မကြာခင် ဆရာမောင်စိုးသစ် (မန္တလေး) ရောက်လာမည်။ နောက်ထပ် သိပ်မကြာခင်လေးမှာပဲ မောင်သစ်ဦး(မြစ်ခြေ) ရောက်လာမည်။ ရဲရင့်ပိုင်အောင် ရောက်လာမည်။ လူစုံပြီဆိုလျှင် ညဉ့်နက်သည်အထိ ကျွန်တော်တို့ ပြောဖြစ်ကြသည်မှာ မဂ္ဂဇင်းစာမျက်နှာများပေါ်မှ ပုံနှိပ်ကဗျာအကြောင်း၊ ကဗျာဆိုင်ရာ စာအုပ်များမှ ရရှိလာသည့် ကဗျာဆိုင်ရာ နည်းနာတက္ကနစ်များအကြောင်း၊ နောက်ပြီး ဆရာမောင်ကြည်သာ(တောင်တွင်း)ရဲ့ ဘောလုံးနည်းစနစ်နဲ့ ကဗျာတွေ၊ ဆရာမောင်စိုးသစ်(မန္တလေး)ရဲ့ R နည်းစနစ်နဲ့ စကားလုံးဆော့ကစားမှုတွေ၊ ရဲရင့်ပိုင်အောင်ရဲ့ ကွမ်းရွက်သပ်စနစ်နဲ့ အချစ်ကဗျာတွေ။ မောင်သစ်ဦး(မြစ်ခြေ)က အဲဒီတုန်းက ၀တ္ထုရှည် အားသန်နေချိန်ဖြစ်သည်။ ထိုစဉ်က ကျွန်တော်က ကဗျာလောကထဲ ခြေစုံပစ်ဝင်ခါစ ဖြစ်သည်။ မဂ္ဂဇင်းပေါ်က နှစ်သက်သည့်ကဗျာတစ်ပုဒ်အကြောင်း စကားစလိုက်မိသည်နှင့် ထိုကဗျာဆရာ၏ အခြားကဗျာများနှင့် ထို ကဗျာဆရာ၏ ဖြတ်သန်းမှုကိုပါ ဆရာမောင်ကြည်သာ(တောင်တွင်း)နှင့် ဆရာမောင်စိုးသစ်(မန္တလေး)ဆီက ကြားရ သည်။ ထိုလက်ဖက်ရည်ဆိုင်လေးတွင် ကျွန်တော်တို့ ရေးဖြစ်သည့်ကဗျာများ တစ်ယောက်ကိုတစ်ယောက် ပေးဖတ်ကြ သည်။ ကဗျာတစ်ပုဒ်၏ အလှဓါတ်၊ ပြေပြစ်စီးဆင်းမှုရစ်သမ်နှင့် နရီ၊ ကဗျာထဲက ပြောသူနှင့် ကဗျာ၏ အနက်ဂယက်များ။ ထို လက်ဖက်ရည်ဆိုင်လေးသည် ကျွန်တော့်အတွက် ကဗျာသင်တန်းကျောင်းတစ်ခုလည်း ဖြစ်သည်။
  ကဗျာလောကအ၀န်းအ၀ိုင်းထဲ ကျွန်တော်ရောက်တာ တော်တော်နောက်ကျသည်။ ၂၀၀၅ ခုနှစ် နှောင်းပိုင်းလ များမှ ဖြစ်သည်။ ကျွန်တော့်ဦးလေး မိတ်ဆက်ပေးသဖြင့် ဆရာ မောင်ကြည်သာ(တောင်တွင်း)၊ ဆရာ မောင်စိုးသစ် (မန္တလေး)တို့နှင့် ဆုံရသည်။ မိမိကိုယ်မိမိ ကဗျာဆရာဖြစ်ရမည်ဟု မရည်ရွယ်ဖူးခဲ့သလို ၀ါသနာပါသည် ဆိုရုံ ကဗျာလေးများ မတောက်တခေါက် ရေးမိတာလေးတွေပဲရှိသည်။ သို့သော် ကဗျာဆရာကြီးများဖြင့် ဆုံတွေ့ရသည့်အခါ ငုံ့လျှိုးနေသည့် ကဗျာဆရာဖြစ်ချင်စိတ်က ခေါင်းထောင်ထလာသည်။ ကျွန်တော့်ကဗျာပိုးက ငယ်ထိပ်ထိ အဆိပ် တက် လာသည်။ ခေတ်ပေါ်ကဗျာနှင့် ပတ်သက်၍ ဆရာ မောင်ကြည်သာ(တောင်တွင်း)မှ မကြာခဏ ပြောဖူးသည့် စကားရှိသည်။
`အို ကတ္တရာလမ်းမ၊ နာမည်များလွတ်မကျအောင် ကိုင်ထားပါ´ဆိုသည့် ကဗျာစာသားကို ချက်ချင်း နား မလည်ခဲ့ကြောင်း၊ ဈေးချိုကုန်တိုက်မှာ အလုပ်စ၀င်မှ ထိုကဗျာစာသား၏ အနက်အဓိပ္ပာယ်ကို သဘောပေါက်ခဲ့ကြောင်း´၊ ကဗျာတစ်ပုဒ်၏ အနှစ်သာရ၊ အနက်အဓိပ္ပာယ်သည် ကိုယ်တွေ့ကြုံလာသည့်အခါ ပိုမိုလေးနက် အရသာရှိ ရသည့် အကြောင်းကို ဆရာက ပြောလိုခြင်းဖြစ်သည်။ ထိုသို့ဖြင့် ခေတ်ပေါ်ကဗျာကို ခံစားနားလည်တတ်အောင် လမ်းပြ ပေးခဲ့ သည်။ စာပေသစ်၊ မိုးဝေကဗျာ၊ တော်လှန်ကဗျာ၊ ခေတ်ပေါ်ကဗျာ စသည်ဖြင့် ကဗျာဖြတ်သန်းမှု အဆင့်ဆင့် တို့ကို ဆရာတို့ ထံမှတဆင့် သိခဲ့ရသည်။ မောင်လေးအောင်ဆိုလျှင် နစ်ဆင်နှင့် စစ်တုရင်ကစားခြင်း၊ ဖော်ဝေးဆိုလျှင် `နှလုံးအိမ်ထဲ ရေငတ်ခြင်း´၊ အောင်ချိမ့်ဆိုလျှင် `ဂန္ထ၀င်မမ´၊ အိုအောင်ဆိုလျှင် `နွားကျောင်းသား´၊ ၀င်းမြင့်ဆိုလျှင် `ပဲ့တင်´၊ မိုဃ်းဇော် ဆိုလျှင် `စိန်ခြယ်ပန်းများဖြင့်´၊ ခရမ်းပြာထက်လူဆိုလျှင် `လေယာဉ်ပျံကြီးစီးကာသွား ရေကူးပြီးပြန်ခဲ့´၊ လှသန်းဆိုလျှင် `အာရှတိုက် တစ်နေရာ´၊ စိုင်းဝင်းမြင့်ဆိုလျှင် `မိသားစု´၊ မောင်ယုပိုင်ဆိုလျှင် `သားအဖဂစ်တာ´။ မောင်ချောနွယ် ဆိုလျှင် `မောင်ချောနွယ်အတု´၊ `ကိုက်လမ်း´၊ `ကြယ်ပြာလေးနဲ့ ထမင်းစားပြီးနောက်´၊ သစ္စာနီဆိုလျှင် `မြင်စိုင်းသူများ´၊ ဆရာ နေမျိုးဆိုလျှင် `ကဗျာဆရာဝံပုလွေ´၊ နိုင်မွန်အောင်သွင်ဆိုလျှင် `သတ္တုမိုးများ´ကဗျာစာအုပ်၊ မောင်သိန်းဇော် ဆိုလျှင် `နှင်းရည်စက်လက် +ရှုမျှော်ခင်း ၂၁´ စသည်ဖြင့် ကဗျာဆရာနှင့် ကဗျာ၊ ကဗျာစာအုပ်များအား တွဲပြီး မှတ်မိစေခဲ့သည်။
ဆရာ မောင်စိုးသစ် (မန္တလေး)နှင့်က အိမ်ချင်း ပိုနီးသဖြင့် ကဗျာစာအုပ်နှင့် ကဗျာဆိုင်ရာစာအုပ်များ ပိုပြီး ငှားဖတ်ဖြစ်သည်။ ဆရာ မောင်စိုးသစ်ကလည်း ကျွန်တော်ဖတ်သင့်သည့်စာအုပ်များကို တကူးတကရှာဖွေပြီး ငှားဖတ် ပေးသည်။ ဆရာမြဇင်၏ `ကဗျာ့နရီနှင့် နမိတ်ပုံ´၊ ဆရာအောင်ဝေးရဲ့ `ကဗျာအလုပ်ရုံကလေး´၊ ဆရာ မောင်ခိုင်မာ၏ `ဧည့်ခန်းဆောင်များကို ဖြတ်သန်းခြင်း´၊ ဆရာမောင်သာနိုး၏ `ထင်းရှူးပင်ရိပ်´၊ `တောမှော်ရုံလမ်း´၊ ဆရာနရီမင်း၏ `မျှော်စင်´ နိုင်ငံတကာ ကဗျာခံစားမှုဆောင်းပါးများ၊ ဆရာဇော်ဇော်အောင်၏ `သရဖူဆောင်းပါးများ´ စသည်ြ့ဖင့် ဆရာ တို့၏ ကျေးဇူးဖြင့် ဖတ်မှတ်လေ့လာခွင့်ရခဲ့သည်။ နောက်ပိုင်းထွက်သမျှ ကဗျာစာအုပ်၊ ကဗျာဆိုင်ရာ စာအုပ်တွေကို လစာ ထုတ်တိုင်း ၀ယ်သိမ်းဖြစ် စုဖြစ်ခဲ့သည်။ အလင်းဆိုင်ညချမ်းများတွင် တစ်ယောက်ဝယ်ဖြစ်သည့် ကဗျာစာအုပ် တစ်ယောက် လှည့်ဖတ်၊ ကဗျာအကြောင်းတွေ ပြောဖြစ်ကြ။ ကျွန်တော်ကတော့ နားထောင်သူ သက်သက်။
သည်လိုနှင့် ကျွန်တော်တို့ Any Way စာပေ၀ိုင်းလေးကို ဖန်တီးဖြစ်ကြသည်။ ၂၀၀၅ နှောင်းပိုင်းကနေ ၂၀၀၇ စက်တင်ဘာ ရွှေဝါရောင်အရေးအခင်းအထိ။ စာပေ၀ိုင်းလေးမှာ တက်ရောက်လာသူတိုင်း အလှည့်ကျ ကဗျာရွတ်ခြင်း၊ ၀တ္ထု ဖတ်ခြင်း၊ စာပေလောကအတွေ့အကြုံများဖလှယ်ခြင်း၊ တစ်ပတ်လျှင် ထင်ရှားသည့် ကဗျာဆရာကြီးတစ်ဦးစီ၏ အတ္ထုပတ္ထိ နှင့် သူ၏ စာပေလက်ရာများအကြောင်း နာကြားမှတ်သားခဲ့ကြရသည်။ အပတ်စဉ်တိုင်း မိမိကဗျာဓာတ်ကို နိုးစေရန်အတွက် ခေါင်းစဉ်ပေးကာ ထိုခေါင်းစဉ်ကို တက်ရောက်လာသူတိုင်းမှ ကဗျာတစ်ပုဒ်ရေးရန် နှိုးဆော်ပြီး ကြိုးစားရေးသားခဲ့ကြသည်။ ထိုသို့ဖြင့် Any Way စာပေ၀ိုင်းလေးသည်လည်း တစ်ပတ်ထက် တစ်ပတ် လူဦးရေ ပိုများလာသည်။ ကဗျာ၊ ၀တ္ထု၊ အက် ဆေး၊ ဘာသာရေး၊ နိုင်ငံရေးများအထိ အကြောင်းအရာများလည်း စုံလင်လာသည်။ ၂၀၀၇ ရွှေဝါရောင်နောက်ပိုင်း စာပေ ၀ိုင်းလေးအား လ အနည်းငယ် ရပ်နားခဲ့ကြပြီးနောက် နန်းဦးလွင်`မိသားစု´ကဖေးရဲ့ တနင်္ဂနေ့များဆီ ကျွန်တော်တို့ စာပေ ၀ိုင်းလေးကို ရွှေ့ခဲ့ကြပြီး ` မိသားစု ကဖေး´စာပေ၀ိုင်းလေးအဖြစ် ဆက်လက်တည်ဆောက်ခဲ့ကြသည်။ အဲဒီနောက် `မိသားစု´ကဖေးကနေ`ရွှေစွန်မင်း´ကဖေးရဲ့ ကြာသပတေးနေ့များဆီသို့ ဆက်လက်ရွေ့ပြောင်းပြီး ယနေ့အထိ`ရွှေစွန် မင်း´စာပေ၀ိုင်း အဖြစ် ဆက်လက်အကောင်အထည်ဖော် ၀ိုင်းဖွဲ့နေကြဆဲ ဖြစ်သည်။
ယခု ၂၀၁၅၊ အောက်တိုဘာတွင် ဆရာ မောင်ကြည်သာ(တောင်တွင်း)နှင့် ဆရာ မောင်စိုးသစ်(မန္တလေး)တို့ နှစ်ဦး၏ `ဆက်ကစားမယ် ပြန်ကွေ့ခဲ့ပါ´ ဟု အမည်ပေးထားသည့် ကဗျာစာအုပ်လေးတစ်အုပ် ထွက်ရှိလာပါသည်။ ယခု စာအုပ်မတိုင်ခင် ဆရာမောင်ကြည်သာ(တောင်တွင်း) `ဖုံးကွယ်ထားတဲ့ အသံ´ ကဗျာစာအုပ်နှင့် ဆရာမောင်စိုးသစ် (မန္တလေး)က အေဒီ ၄၅၄၅ ခေတ်ပေါ်ကဗျာစုစည်းမှု စတဲ့ စာအုပ်များ ထွက်ရှိထားပြီး ယခုစာအုပ်သည့် အဆိုပါ ဆရာနှစ်ယောက်၏ ဒုတိယကဗျာစာအုပ်ဟုလည်း ပြောလို့ရမည် ထင်ပါသည်။ ဆရာမောင်ကြည်သာ(တောင်တွင်း) ၃၄ ပုဒ်နှင့် ဆရာ မောင်စိုးသစ်(မန္တလေး) အပုဒ် ၄၀။ ထို့ပြင် တစ်ဦးချင်းစီ၏ ကဗျာ ၃ ပုဒ်စီကိုလည်း ဆရာ ဇော်ထွန်း၏ အင်္ဂလိပ်ဘာသာပြန်ဆိုမှုဖြင့် ထည့်သွင်းထားပါသည်။
ဆရာမောင်ကြည်သာ(တောင်တွင်း)သည် သူ၏ ကဗျာ ၃၄ ပုဒ်အား ကဗျာရေးသည့်ရက်စွဲ၊ ပုံနှိပ်ဖော်ပြသည့် မဂ္ဂဇင်းနှင့် ဖော်ပြခံရသည့် လများအား အတိအကျဖော်ပြထားသည့်အပြင် ပါဝင်သည့်ကဗျာများအားလည်း ရေးသားသည့် ရက်စွဲအစဉ်လိုက်ဖြင့် စနစ်တကျစီစဉ်ထားသည်ကို တွေ့ရသည်။ ပထမဆုံးပုံနှိပ်ကဗျာ`ပုံပြင်ထဲက ငါးသုံးကောင်´ ၁၁၊ ၇၊ ၁၉၇၇ မှသည် ဖော်ပြထားသည့် နောက်ဆုံးရေးဖြစ်သည့် ကဗျာ `ခေတ်သစ် ဇနက´ ၇၊ ၇၊ ၂၀၁၅ အထိ ကဗျာ ၃၄ ပုဒ်မှာ အသေအချာပိုင်းစစ်ကြည့်လျှင် မိုးဝေ၊ ခေတ်ပေါ်၊ ခေတ်ပြိုင် စသည်ဖြင့် ကဗျာခေတ်သုံးခေတ်ကို ဖြတ်သန်းထားသည်ကို တွေ့ရသည်။ ခုနှစ်သက္ကရာဇ်အလိုအရ ကဗျာခေတ်သုံးခေတ်ကို ဖြတ်သန်းခဲ့သည်သာမဟုတ်၊ အဆိုပါ ခေတ်သုံးခေတ် အတွင်း ဆရာ မောင်ကြည်သာ (တောင်တွင်း)၏ ကဗျာအရွေ့၊ ကဗျာရေးဟန်ပြောင်းလဲမှု၊ ကဗျာလိုင်းစီပုံ၊ ကဗျာနောက်ခံ နိုင်ငံရေးအခင်းအကျင်း၊ ကဗျာ တည်ဆောက်မှု၊ ကဗျာအပေါ် သိမှုအပြောင်းအလဲနှင့် ကဗျာဆီ သွားရာလမ်း စသည်ဖြင့် စိတ်ဝင်စားဖွယ် ကောင်းလွန်းလှသည်ကို တွေ့ရသည်။
ပထမဆုံးပုံနှိပ်ကဗျာဖြစ်သည့် `ပုံပြင်ထဲက ငါးသုံးကောင်´၏ နောက်ခံနို်င်ငံရေးအခင်းအကျင်းအနေနှင့်ကြည့်လျှင် မဆလတစ်ပါတီအာဏာရှင်ခေတ်၊ ၇၄ ဇွန် အလုပ်သမားသပိတ်၊ ၇၄ ဒီဇင်ဘာ ဦးသန့်အရေးအခင်း၊ ၇၆ မှိုင်းရာပြည့် သပိတ် စတဲ့ ကျောင်းသားလှုပ်ရှားမှုများ၊ အရေးအခင်းများ၊ သပိတ်အကြမ်းဖက်ဖိနှိပ်ဖြိုခွဲခံရမှုများ၊ ကျောင်းသားများမတရား ဖမ်းဆီး ထောင်ချခံရမှုများ၊ အနစ်နာခံပြီး အသက်သွေးချွေးပေးဆပ်ခဲ့ရတဲ့ ကျောင်းသားခေါင်းဆောင်များ စတဲ့ အခြေအနေတွေဟာ ကဗျာထဲမှာ ထင်ဟပ်နေခဲ့ပါတယ်။

(၁)
. . . . . . . .
`ပထမ ငါး ၀ီရိယမရှိ
ပျင်းရိလေးတွဲ ဇွဲမထုတ်ဘဲ
ကံကိုပဲ ပုံချတော့
လှော်တက်နဲ့ အရိုက်ခံရပြီး
သေဆုံးသွားရရှာတယ်
ဒုတိယ ငါး ၀ီရိယ ရှိတယ်
ကြိုးစားတယ် အားထုတ်တယ်
ဒါပေမယ့်
လှေအစောင်းနဲ့ မကြုံတော့
အကြံကို အသိခံရပြီး
လှော်တက်နဲ့ အရိုက်ခံရလို့
သေရရှာပြန်တယ်
တတိယ ငါး ၀ီရိယ ရှိတယ်
ကြိုးစားတယ် အားထုတ်တယ်
အခွင့်အခါကို သိတယ်
လှေအစောင်းကို ကြည့်ပြီး
သတိနဲ့ ခုန်လိုက်တော့
သေဘေးက လွတ်ရတယ်`
(၂)
`ရင်ထဲမှာ စွဲငြိနေတာက
ဒုတိယ ငါးပါပဲ
အကယ်၍များ
ဒုတိယ ငါးသာ အသေမခံခဲ့ရင်
တတိယ ငါး ဟာလည်း။
(ပုံပြင်ထဲက ငါးသုံးကောင် ကဗျာမှ)

 နောက်ထပ်တွေ့ရသည့် ကဗျာတစ်ပုဒ်မှာ`အတောင်ပံ´ဖြစ်သည်။ ရေးသည့်ရက်စွဲမှာ ၁၀၊ ၄၊ ၁၉၈၆။ ရေးဖြစ် သည့်ရက်စွဲအရ သမိုင်းဝင် ရှစ်လေး လုံးအရေးအခင်းကြီးမဖြစ်မီ နှစ်ကာလအပိုင်းအခြား။ ထိုအချိန်က နိုင်ငံရေး ရေဆူမှတ် ရောက်ရှိနေချိန်။ လူထု၏ သည်းခံနိုင်စွမ်းအဆုံးစွန်းရောက်လုချိန်၊ စစ်အာဏာရှင်စနစ်ကို အခါအခွင့်သင်တိုင်း ဆန့်ကျင် ဆန္ဒပြခဲ့ကြသည့် ကျောင်းသားနှင့် ပြည်သူလူထု လက်တွဲညီစွာ ဖောက်ထွက်ပျံသန်းရန် အားယူနေသည့်ကာလ။ ထိုနှစ် ကာလအပိုင်းအခြားတွင် ရေးသားခဲ့သည့်` အတောင်ပံ´ ကဗျာမှာ ယခု သည်ဘက်နှစ်များမှ မဂ္ဂဇင်းစာမျက်နှာပေါ်တွင် ပုံနှိပ်ဖော်ပြခံရသည်မှာ မဆန်းလှပေ။ `အဲဒီတုန်းကတော့ ည ဆိုတာတောင် ရိုးရိုးအဓိပ္ပာယ်ဖွဲ့လို့ မရ။ ည ဆိုရင် ခေတ်ဆိုး ခေတ်ကြပ်ကြီးကို ဆိုလိုတယ်ဆိုပြီး လွမ်းချင်တာတောင် လွမ်းခွင့်မရဘူး´ဟု ဆရာမောင်ကြည်သာ ပြောဖူးသည်ကို ပြန်အမှတ်ရမိသည်။ ပုံနှိပ် ဖော်ပြသည့်ရက်စွဲမှာ မတ်လ၊ ၂၀၁၄။ ရုပ်ရှင်တေးကဗျာမဂ္ဂဇင်းတွင် ဖြစ်သည်။
၁၄၊ မေလ ၂၀၁၄ တွင် သိမ်းဆည်းခံမြေများ ပြန်လည်ရရှိရေးအတွက် သဲကုန်းမြို့ပေါ်တွင် ဆန္ဒပြ၊ ဆုတောင်းမှု ပြုလုပ်သော လယ်သမားများကို ရဲတပ်ဖွဲ့က အကြမ်းဖက်ဖမ်းဆီးခဲ့ကြသည်။ ထိုအရေးတွင် ဗကသကျောင်းသား ကောင်းထက်ကျော် ဖမ်းဆီးရိုက်နှက်ခံရသည်။ ထိုသို့ရိုက်နှက် ဖမ်းဆီးခဲ့သည်ကို မေ ၁၇ တွင် အထက်ဗမာပြည် ဗကသ အဖွဲ့ချုပ်က ကန့်ကွက်ဆန္ဒပြခဲ့ကြသည်။ ထို့နောက် ၂၀၁၄၊ စက်တင်ဘာလ ၃၀ ရက်နေ့တွင် ပြည်ထောင်စု လွှတ်တော်မှ နေ၍ အမျိုးသား ပညာရေး ဥပဒေကို အတည်ပြုခဲ့သည်။ အဆိုပါ ဥပဒေတွင် ပါဝင်သည် ပြဋ္ဌာန်းချက်များသည် လွတ်လပ်စွာ ပညာသင်ကြားခွင့်ကို တင်းကျပ်သော ဗဟိုချုပ်ကိုင်မှုဖြင့် ချည်နှောင်ထားပြီး ပညာရေးမူဝါဒများသည် ဒီမိုကရေစီ မဆန်ခြင်း၊ လူ့အခွင့်အရေး တန်းတူညီမျှမှုမရှိခြင်း၊ ငြိမ်းချမ်းစွာ ပညာသင်ကြားခွင့်ကို အာမခံချက်မပေးနိုင်ခြင်းတို့ကြောင့် နိုင်ငံလုံး ဆိုင်ရာ ကျောင်းသားထုက ပြင်းပြင်းထန်ထန်ကန့်ကွက်ခဲ့ကြပြီး အမျိုးသားပညာရေး ဥပဒေသစ်အတွက် တိုက်ပွဲဝင်ရန် ၂၀၁၄၊ နိုဝင်ဘာ ၁၂ နှင့် ၁၃ ရက်နေ့တို့တွင် ဒီမိုကရေစီ ပညာရေးလှုပ်ရှားမှု ဦးဆောင်ကော်မတီကို ဖွဲ့စည်းခဲ့ကြသည်။ ၂၀၁၅ ဇန်န၀ါရီ ၂၀ မှာတော့ စတုတ္ထကျောင်းသားသပိတ်ဟု ခေါ်ဆိုနိုင်မည့် ဒီမိုကရေစီပညာရေးတောင်းဆိုမှု ကျောင်းသား သပိတ် ခရီးရှည်ချီတက်ပွဲကြီး စတင်ခဲ့လေသည်။ ချုပ်နှောင်မှုအစည်းအတားများကို ရဲရဲဖောက်ထွက် ပျံသန်းကြရမည်။ ထိုသို့ ပျံသန်းသည့် အခါ လွတ်မြောက်ချင်လည်း လွတ်မြောက်မည်။ မလွတ်မြောက်နိုင်လျှင်လည်း နာကျင်မှုများဖြင့် ကြုံတွေကြရမည်။ ၁၉၈၆ က နာကျင်မှုနှင့် လွတ်မြောက်လိုမှုများသည် တိုက်ဆိုင်မှုများရှိလာသည့်အခါ ကဗျာ၏ အနှစ် သာရကို တခါ ပြန်လည်ရရှိလာသည်။ တနည်းဆိုရသော် ကဗျာတစ်ပုဒ်သည် နှစ်ကာလမည်မျှကြာသည်ဖြစ်စေ သေဆုံး မသွား။ အခါအခွင့်ရှိတိုင်း ပြန်လည် ရှင်ပြန်ထမြောက်နေသည်ဟု မြင်မိသည်။

`ပျံကြစမ်းဟေ့
ပျံကြစမ်း
အစွမ်းရှိသလောက် ပျံကြစမ်း။
မပျံနိုင်တဲ့အခါ
နားရမယ်
ပျံနေရင်းနဲ့လည်း စုတ်ပြဲသွားနိုင်တယ်´
(အတောင်ပံ ကဗျာမှ)

 ထိုခုနှစ်များကို ကျော်လွန်လာသည့်အခါ ဆရာမောင်ကြည်သာ(တောင်တွင်း)၏ ကဗျာများသည် ပြောင်းလဲ လာသည်။ ကဗျာရေးဟန်အပြောင်းအလဲထက် အကြောင်းအရာ ရွေးချယ်မှု၊ တင်ပြသည့်နယ်ပယ်နှင့် ကဗျာထဲတွင် ထည့်သွင်းထားသည့် ပတ်ဝန်းကျင်အပြောင်းအလဲများကို တွေ့လာရသည်။ အထူးသဖြင့် ၁၉၉၅ နောက်ပိုင်းကဗျာများတွင် အရင်မိုးဝေနှောင်းပိုင်းကဗျာများလို လက်သီးလက်မောင်းတန်းသော ကဗျာများ မဟုတ်တော့။ သို့သော် အရင်အတိုင်း မပြောင်းမလဲ ရှိနေသောခေတ်စနစ်၏ ဖိနှိပ်မှု၊ ရိုက်ခတ်မှုနှင့် နာကျင်မှုများကို ဘောလုံးအားကစားနည်းထဲ ထည့်သွင်းပြီး ဖော်ပြလာသည်။ တနည်းအားဖြင့် စာပေလွတ်လပ်ခွင့်မရသည့် အချိန်ကာလတစ်ခုအတွင်း နောက်ခံဝန်းကျင် အပြောင်း အလဲလုပ်ပြီး ဖော်ပြခြင်းဖြစ်သည်။ ယခင်စာအုပ် `ဖုံးကွယ်ထားသည့်အသံ´ထဲတွင် ပါဝင်သည့် `ဒေးဗစ်ဘက်ခမ်းရဲ့ ကန့်လန့်ဖြတ်ဘော´၊` စကားလုံးတွေကို သင့်ခြေထောက်ထဲမှာပဲ ထားလိုက်ပါ´၊`ပွဲစဉ်ဇယား´၊`ကစားသမား´ နှင့် ယခု စာအုပ်ပါ`မှန်ထဲက သူစိမ်း´၊ `ကိုယ်ဖျော်တဲ့ လက်ဖက်ရည်´ စသည့် ကဗျာများသည် ဘောလုံးနယ်ပယ်မှ ဝေါဟာရများ ဖြင့် ကဗျာကို ပြုလုပ်တည်ဆောက်ထားခြင်းပင် ဖြစ်သည်။

`ဖြစ်စဉ်ကြီးတစ်ခုလုံးက ဒီလိုပဲလား
ရိုးရိုးသားသား ကာကွယ်လိုက်တာလည်း ပင်နယ်တီ အပေးခံရ
ကိုယ်သွင်းလိုက်တဲ့ ဂိုးကျတော့လည်း လူကျွံဘောတဲ့
အပေးအယူအချိတ်အဆက်တွေကလည်း လွဲလိုက်သလားမမေးနဲ့
အေးလေ
ကိုယ့်ဂိုးကိုယ် ပြန်မသွင်းမိရင် ၀မ်းသာရတော့မယ်´
(မှန်ထဲက သူစိမ်း ကဗျာမှ)

`ပြောင်းလဲလာတဲ့ ကဗျာတွေကို ဖတ်လိုက်မိကြတဲ့ ကဗျာရေးသူတချို့ဟာ ငါတို့တော့ ကျန်နေရစ်တော့မှာပဲ ဆိုတဲ့ စိုးရိမ်စိတ်နဲ့ ကသောကမျောအတင်း ကဗျာပုံစံပြောင်းရေးဖို့ ကြိုးစားလာကြပြန်ပါရော။ ပြောင်းလဲသွားတဲ့ အနှစ်သာရကို မဆုပ်ကိုင်မိဘဲ အပြင်ပန်းအသွင်အပြင်၊ ရေးဖွဲ့ပုံတွေကို တုပ ရေးဖွဲ့ကြတဲ့အခါ ကဗျာဖတ်သူတွေအတွက် စိတ်ပျက်စရာစိတ်ညစ်ညူးစရာ ကဗျာတွေ ဖြစ်လာပါတယ်။ အဲဒီ ကဗျာရေးသူတွေနဲ့ မောင်ကြည်သာ မပါတာကတော့ဖြင့် အတော်စိတ်လွတ်လပ်မိပါတယ်´
 ဆရာမောင်ကြည်သာ(တောင်တွင်း)၏ `ဖုံးကွယ်ထားတဲ့အသံ´ ကဗျာစာအုပ်မှ ဆရာမောင်ပြည့်မင်း၏ မှတ်ချက် စကားဖြစ်ပါသည်။ ဆရာ မောင်ကြည်သာ(တောင်တွင်း)သည် မိုးဝေခေတ်မှ ယနေ့အထိ ကဗျာအရွေ့နှင့် ကဗျာ ရေစီးကြောင်းအပြောင်းအလဲအပေါ် ထပ်ကြပ်မကွာ လိုက်ပါလျှက်ရှိသည့် ကဗျာဆရာတစ်ဦးဖြစ်သည်။ ယနေ့ ထွက်သမျှ ခေတ်ပေါ်၊ ခေတ်ပြိုင်ကဗျာစာအုပ်များ၊ ကဗျာဗေဒဆိုင်ရာစာအုပ်များနှင့် မျက်ခြေမပြတ်သူ၊ လူငယ်ကဗျာများ၏ ကဗျာ လမ်းကြောင်းသစ်ရှာဖွေမှုတွင် စိတ်ရောကိုယ်ပါ ထဲထဲဝင်ဝင်ပါဝင်သူ၊ ကိုယ်တိုင်လည်း ပုံသဏ္ဍာန်ဦးစားပေးကဗျာများ၊ စကားပြေကဗျာများ၊ ခေတ်ပြိုင်ဟန်ကဗျာများကိုလည်း ရေးဖွဲ့နေသူတစ်ဦးဖြစ်သည်။ ယခုစာအုပ်တွင် ဖော်ပြထားသည့် `မီးခိုးများ´ကဗျာတွင် ကဗျာတစ်ပုဒ်လုံးကို မြန်မာစာလုံးပေါင်းသတ်ပုံကျမ်း စာမျက်နှာ ၁၉၁ ရှိ မီးဝေါဟာရ စကားလုံး များဖြင့် ပြုလုပ်ထားသည်။ `တစ်ယောက်တစ်လမ်း´ ကဗျာတွင် ကိုယ်ပိုင်စကားလုံးတစ်လုံးမှ အသုံးပြုခြင်းမရှိဘဲ မိမိ အနီး အနားနှင့် မှတ်ညဏ်ထဲတွင် ဖျတ်ကနဲပေါ်လာသော စကားလုံးများ၊ စာကြောင်းများ၊ အရာဝတ္ထုများကို ချိတ်တွဲကာ ကဗျာ ပြုလုပ်ထားသည်။ `ဆက်ကစားမယ်´ကဗျာတွင် လူကြိုက်များတီဗီအစီအစဉ်တစ်ခုဖြစ်သည့် ပဟေဠိနန်းတော်မှ အစီအစဉ် တင်ဆက်သူ မောင်မောင်အေး၏ ဆက်ကစားမလား၊ ဒီမှာပဲရပ်မလားဆိုသည့် မေးခွန်းအပေါ်တွင် အခြားတီဗီ ဇာတ်လမ်းတွဲ တစ်ခုမှ စကားလုံးများဖြင့် ချိတ်တွဲဆက်စပ်ကာ ကဗျာပြုလုပ်ထားသည်ကို တွေ့ရသည်။

`လှေကလေးနဲ့ မြစ်ကိုဖြတ်လို့ သူတို့ ကမ်းကပ်နိုင်သွားတယ်
သူတို့ အသက်ရှင်နေသေးတယ် တဲ့

အနည်းဆုံးက သုံးထောင်ဆိုလား၊ အများဆုံးက ငါးသိန်းဆိုလား
ဆက်ကစားပါမယ်´
(ဆက်ကစားမယ် ကဗျာမှ)
 ဆက်လက်ပြီး ဆရာ မောင်စိုးသစ်(မန္တလေး)၏ ကဗျာအပုဒ် (၄၀) ကို ဆက်ဖတ်မိသည်။ ဆရာမောင်စိုးသစ် (မန္တလေး)၏ ကဗျာများသည် ရိုးရှင်းသည်။ ဖတ်ရလွယ်ကူသည်။ အနက် အဓိပ္ပာယ် သိုဝှက်မှုနည်းပါးသည်။ ကဗျာ ဖတ်သူ နှင့် တတ်နိုင်သမျှ နီးအောင် ကြိုးစားအားထုတ် ရေးလေ့ရှိသည်။ သို့သော် ဆရာ့ကဗျာတွေကို ဖတ်ရသည်မှာ ဖတ်ပြီးမှ အတွေးက ပြန်စသည်။ မိမိအဇ္ဈတ္တကို ရေးဖွဲ့နေရာမှ ပြင်ပဗဟိဒ္ဓိကို လှမ်းချိတ်ဆက်သွားသည်။ ဆရာ မောင်စိုးသစ်၏ စကားလုံးသုံးစွဲမှုကို ဂရုစိုက်သည်။ စကားလုံးတစ်လုံးချင်းစီ၏ အားကို အပြည့်အ၀ အသုံးချသည်။ ခေတ်ပေါ်ကဗျာ၏ အလှဓါတ်ဖြစ်သည့် ပြေပြစ်စီးဆင်းမှုကို ကဗျာတိုင်းတွင် တွေ့ရသည်။

`အို . . . ပင်လယ်ငဲ့
ပြဒါးသုတ်ထားတဲ့ မှန်တစ်ချပ်အောက်
အိပ်မွေ့အချခံထားရတဲ့ လှိုင်းတံပိုးတွေ သိုဝှက်ပြီး
မြားချွန်နေရော့သလား
ငါတို့ဟာ အကြိမ်ကြိမ် ခြေစမ်းခဲ့ဖူးတော့
မင်းရဲ့ ကစားကွက်အောက် မနစ်မြှုပ်နိုင်တော့ဘူး
(လှေငယ် ကဗျာမှ)

 အေဒီ ၄၅၄၅ နှင့် ယခုစာအုပ်ကြားတွင် သုံးနှစ်တိတိ ကွာခြားသွားသည်။ ဆရာမောင်စိုးသစ် (မန္တလေး)ကို ကျွန်တော်က အစ်ကိုလို့ပဲ ခေါ်သည်။ အစ်ကို ကဗျာအရေးကျဲသွားသည်။ အပတ်စဉ်ထုတ် ဂျာနယ်တစ်ခုတွင် အားကစား ဆောင်းပါးများမရေးတော့။ ၀တ္ထုတို မရေးဖြစ်တော့သလောက်ဖြစ်သွားသည်။ ယခင်က မဂ္ဂဇင်း စာမျက်နှာများ ပေါ်တွင် လစဉ်တွေ့နေရသည့် မောင်စိုးသစ်(မန္တလေး) မဟုတ်တော့။ မိသားစုအရေးနှင့် လုပ်ငန်း တာဝန်ဝတ္ထရားများ အကြား နားရက်၊ ပိတ်ရက်နည်းပါးစွာ ဖြတ်သန်းနေရသည်။ ယခင်က အစ်ကို့၏ ညဂျူတီများတွင် အဖော်လုပ်ကာ အတူတူ လိုက်စောင့်ရင်း ကဗျာအကြောင်းများ ပြောခဲ့ဖူးသည်။ နေခြည်ထမင်းပေါင်းနှင့် အစုံသုပ်ကို စားရင်း ကျုံးနံဘေး ညချမ်းများ ကို စက်ဘီးတစ်စီးစီနှင့် ဖြတ်သန်းခဲ့ကြသည်။ ကဗျာအပေါ် ယုံကြည်ချက်၊ ခံယူချက်နှင့် ကဗျာလမ်းကြောင်း အကူး အပြောင်းများစွာကို အစ်ကို့ဆီမှ သင်ယူမှတ်သားခဲ့ဖူးသည်။ ယခု အစ်ကို့ကဗျာတွေကို စာအုပ်တစ်အုပ်အဖြစ် ကျွန်တော် ပြန်ဖတ်ခွင့်ရသည့်အတွက် ၀မ်းသာမိသည်။ အစ်ကို့ဆီက ခေတ်ပေါ်ကဗျာရဲ့ ရနံ့ကို ကျွန်တော်ပြန်ရသည်။ ဘာသာစကား တစ်လုံးချင်းစီအပေါ် အာရုံစူးစိုက်မှုနှင့် အလေးအနက်ထားမှုကို ပြန်ရသည်။

`ကမ္ဘာမှာ လက်နက်စက်ရုံ ဘယ်နှရုံတည်ပြီးရင်
စစ်ပွဲ ဘယ်နှခု ထိုးကျွေးရသလဲ
ကျည်လွတ် မီးလွတ် နေ့ရက်တွေက
ဘယ်ဥတုနဲ့မှ ရွာတဲ့မိုးလဲ
မိုးများရာ ရေလိုက်နေတဲ့ ခေတ်
အဲဒီ ကြောက်ခေတ်ကြီး
ကမ္ဘာဦးစ စလည်လာသလို
လူလည်တွေ ပတ်ပတ်လည်နေရောပေါ့
အမှန်တရားက
ဘာကြောင့် ဘယ်လို မူးရင်း ခေါင်းကိုက်နေရတာလဲ´
(လူလည်တွေနဲ့ ခပ်လည်လည် ခေတ် …ခစ် ကဗျာမှ)

ရေတွင်းမတူးဘဲ
ရေသန့်ဗူးဝယ် ရေကြည်သောက်နေတဲ့ ခေတ်မှာ
ငါတို့ အိပ်မက်တွေက
လွန်ဆွဲတိုင်း ရွာတဲ့မိုး မဟုတ်ဘူး
အနုပညာအခင်းအကျင်းထဲ
ငါတို့ရဲ့ ပိုစတာတွေ လိုက်ဖက်ကြည့်တော့
လူကြိုက်နည်းတဲ့ ဇာတ်လိုက်​တွေပဲ
အနုပညာက တွေ့တဲ့ဈေးမှာ
လက်ငင်းဝယ်လို့ရနေရင်
ငါတို့မှာ သမိုင်းဘယ်ရှိပါ့မလဲ
(ငါတို့ ကျောနံပါတ်တွေပေါ်မှာ သမိုင်း ရှိတယ် ကဗျာမှ)
 ဆရာမျိုးသန့်ကတော့ `ဆက်ကစားမယ် ပြန်ကွေ့ခဲ့ပါ´ ကဗျာစာအုပ်လေးကို အောက်ပါအတိုင်းအမှာစာ ရေးပေး ထားသည်ကို တွေ့ရသည်။
 ` ဆရာမောင်ကြည်သာ(တောင်တွင်း)နဲ့ ဆရာ မောင်စိုးသစ်(မန္တလေး)တို့ရဲ့ ကဗျာတွေကို ဖတ်ပြီးတဲ့အခါ ပထမဆုံးခေါင်းထဲ ၀င်လာတဲ့အတွေးက သူတို့ရဲ့ကဗျာတွေဟာ ဖတ်ရှုရ ရှင်းလင်းလွယ်ကူပြီး အနက်ဝှက်လွန်းတဲ့ အရေးအသားတွေ နည်းတယ် ဆိုတာပါပဲ။ ပြီးတော့ အကြောင်းအရာပိုင်းက ကြည့်ရင် ပြည်သူအများစုရဲ့ ခံစားမှုကို ထင်ဟပ်တာ တွေ့ရပါတယ်။ တဆက်တည်း သူတို့ရဲ့ ပြည်သူ့ဘက်က တသားတည်း ရပ်တည်လိုတဲ့ စေတနာနဲ့ ဖွဲ့ဆိုထားတဲ့ ကဗျာတွေက အများစုဖြစ်တာကို တွေ့ရပါတယ်´။
 `ခြုံပြောရရင် ကဗျာလေးတွေဟာ ခေတ်ထဲက ပြည်သူတွေရဲ့ အသံတွေကို ရှင်းရှင်း ရေးဖွဲ့ထားကြတယ်´။
 ဟုတ်သည်။ `ဆက်ကစားမယ် ပြန်ကွေ့ခဲ့ပါ´ ကဗျာစာအုပ်ထဲမှ ကဗျာများသည် ရပ်ကွက်ထဲမှ ပြည်သူတို့၏ စကားသံဖြစ်သည်။ ကျေးလက်နေ ပြည်သူတို့၏ စကားသံဖြစ်သည်။ မြို့ပြနေ ပြည်သူတို့၏ စကားသံဖြစ်သည်။ ယနေ့ခေတ် ပြည်သူတို့၏ ခံစားမှုကို ကဗျာဆရာကိုယ်တိုင် ခံစားနေရသည်။ ကဗျာဆရာ၏ ခံစားမှုသည် ပြည်သူတစ်ယောက်၏ ခံစားမှု၊ ပြည်သူ၏ နာကျင်မှုသည် ကဗျာဆရာတစ်ယောက်၏ နာကျင်မှုပင်ဖြစ်သည်။ ကဗျာဆရာသည် ထိုခံစားမှု၊ ထိုနာကျင်မှုကို စကားလုံးအားဖြင့် ဖော်ပြခြင်းဖြစ်သည်။
 ဆရာမျိုးသန့်၏ အမှာစကားအတိုင်းပင် ယနေ့ခေတ်မြင်ကွင်းကျယ်သည် နိုင်ငံရေး၊ ဘာသာရေး၊ လူမှုရေး၊ အစွန်းရောက်ဝါဒီများဖြင့် အုတ်ရောရော ကျောက်ရောရော ရှုပ်ထွေးလွန်းလှသည်။ လူမျိုးရေးပဋိပက္ခလှုံ့ဆော်မှုများ၊ တရား ဥပဒေကင်းမဲ့မှုများ၊ သဘာဝသယံဇာတအရင်းအမြစ်ဆုံးရှုံးမှုများ၊ သဘာဝဘေးအန္တရာယ်ကျရောက်မှုများ၊ ပြည်တွင်း စစ်ရပ်စဲရေးစာချုပ်များ နောက်ကွယ်မှ မပြီးဆုံးသေးသည့် တိုက်ပွဲများ၊ မလိုအပ်သည့် လွတ်ငြိမ်းချမ်းသာခွင့်များနှင့် မလုံခြုံ တော့သည့် နေ့ညများ၊ ၃၀ ရာခိုင်နှုန်းသာ အာမခံနိုင်ပြီး ၇၀ ရာခိုင်နှုန်းမှားယွင်းနေသည့် မဲစာရင်းနှင့် ၂၀၁၅ ရွေးကောက်ပွဲ။ `ဒီမှာပဲ ရပ်မလား။ ဆက်ကစားမလား ´ဆိုသည့်အခါ ကျွန်တော်ကြားလိုက်သည့်အဖြေမှာ
ဆက်ကစားမယ် ပြန်ကွေ့ခဲ့ပါ ဟူ၍ပင် ဖြစ်ပါသည်။

မင်းနဒီခ
၆၊ အောက်တိုဘာ၊ ၂၀၁၅

နေညိုအောင်နှင့် နှင်းမြမြအေးရည်စိမ့်စမ်းလွင်

နေညိုအောင်နှင့် နှင်းမြမြအေးရည်စိမ့်စမ်းလွင်

စာအုပ်အမည် - နှင်းမြမြအေးရည်စိမ့်စမ်းလွင်
ရေးသူ - နေညိုအောင်
ထုတ်ဝေသည့်ကာလ - သြဂုတ်လ၊ ၂၀၁၅
ထုတ်ဝေသည့်တိုက် - ပန်းသာနု စာပေ

 ကဗျာစာအုပ်အမည်က `နှင်းမြမြအေးရည်စိမ့်စမ်းလွင်´အချစ်ကဗျာစုစည်းမှု။ ရေးသူက `နေညိုအောင်´။ စာအုပ် အမည်က ထူးခြားသလို စာအုပ်အပြင်အဆင်ကလည်း ထူးခြားသည်။ လေးထောင့်စပ်စပ်ပုံစံ။ အမှတ်တမဲ့ကြည့်လျှင် ဗီစီဒီတစ်ချပ်အလားဟုပင် ထင်ရသည်။ အတွင်းတွင်လည်း ကဗျာဆရာ၏ ဓာတ်ပုံများကို အရောင်တစ်ရောင်ဖြင့် ညှပ်ထည့် ထားသေးသည်။ ဓါတ်ပုံစုစုပေါင်း ဆယ်ပုံ။ ရယ်ရွင်ဖွယ် ပြောရလျှင် ကဗျာဆရာသည် ကဗျာအားဖြင့်ရော လူအားဖြင့်ပါ သူ၏ စာအုပ်ကို ရောင်းအားမြှင့်တင်လိုဟန် ရှိသည်။ ယခုစာအုပ်၏ အမှာတစ်နေရာတွင်လည်း ကဗျာဆရာကိုယ်တိုင်က `နှင်းမြမြအေးရည်စိမ့်စမ်းလွင် အချစ်ကဗျာစာအုပ်ကို ချစ်တတ်သော ချစ်စိတ်ရှိသော လူသားများအားလုံးသို့ ရည်ရွယ် ပါတယ်´ ဟု ရည်ညွှန်းထားသေးသည်။ ဖြစ်သင့်ပါသည်။ ကဗျာဆရာလူငယ်တစ်ယောက်၏ ကြေကွဲဖွယ် နေ့ညများသည် အလွမ်းများဖြင့် ပြည့်လျှံနေသာ စာမျက်နှာတစ်ခုလည်း ဖြစ်နိုင်သည်။ ကဗျာဆရာကိုယ်တိုင် ၀န်ခံထားသလို ရည်ရွယ်ခဲ့ ဖူးသော နွေဦးသည်လည်း မရည်ရွယ်ခဲ့သော အကြောင်းအရာများနှင့် ပျက်သုဉ်းသွားခဲ့တာလည်း ဖြစ်နိုင်သည်။ ကဗျာ ဆရာသည် လွင့်စင်သွားသော ချစ်ခြင်းတရားအပိုင်းအစများကို တစစီပြန်ဆက်ယူနေခြင်းလည်း ဖြစ်နိုင်သည်။ ဖြစ်နိုင်ချေ များစွာထဲမှ ပိုမိုသေချာသော အရာတစ်ခုမှာ ကဗျာဆရာ၏ မျှော်လင့်နေမှုပင် ဖြစ်သည်။ ဘယ်လို မျှော်လင့်မှုလဲ။ ဘယ်လောက်ထိ မျှော်လင့်နေဦးမလဲဆိုသည်မှာ နှင်းမြမြအေးရည်စိမ့်စမ်းလွင်နှင့် တွေ့မှ ကျွန်တော်တို့ သိခွင့်ရမည့် အဖြေ လည်း ဖြစ်ပါသည်။
 ကျွန်တော်နှင့် နေညိုအောင်သည် ၁၉၈၁ ခုဖွား သက်တူရွယ်တူဖြစ်သည်။ ကျွန်တော်ကဗျာလောကထဲ စတင် ရောက်ရှိသည့် ၂၀၀၅ တွင် သူ့ကဗျာများကို မဂ္ဂဇင်းစာမျက်နှာများပေါ်တွင် ခပ်စိပ်စိပ်တွေ့နေရပြီဖြစ်သည်။ ထွန်းငယ်(၃၁)၊ ဥက္ကံမှူး ဆိုပြီးလည်း သူက ကလောင်တွေ ခွဲထားသေးသည်။ ၂၀၀၉ ခုနှစ်တွင် မောင်ဆေးရိုး၊ နေမျိုး၊ ကိုထက်(ရေဦး)၊ ထွန်းလွင်သွယ်(ဆူးဖြူရိပ်)၊ ဇော်ထိန်တို့နှင့် `ကြယ်များနှင့်အတူ´ ခေတ်ပေါ်ကဗျာစာအုပ်တွင် ပါဝင်ခဲ့သည်။ ထို ၂၀၀၉ ခုနှစ်နောက်ပိုင်းများမှာ သူနှင့် ကျွန်တော် တရင်းတနှီး ပိုမိုပေါင်းဖြစ်ကြသည်။ ၂၀၁၂ တွင် `ပန်းပွင့်တွေ သီချင်း မဆို တတ်ဘူး မျှော်လင့်ခြင်းတနင်္ဂနွေ´ ဟု အမည်ပေးထားသည့် အချစ်ကဗျာစာအုပ်တစ်အုပ် နှစ်ယောက်တွဲ ထုတ်ဖြစ်ကြ သည်။ ကဗျာစာအုပ်နှင့်အတူ ကဗျာဆယ်ပုဒ်ရွတ်ဆို အသံသွင်းထားသည့် စီဒီတစ်ချပ်ပါ လက်ဆောင်ထည့်သွင်း ရောင်းချပေးခဲ့သည်။ ၂၀၁၃ တွင် မင်းမြတ်မွန်၊ လူနှင်းချို(မတ္တရာ)တို့နှင့် တွဲဖက်၍ `ခေါင်းမညိတ်တတ်တဲ့ အဓိပ္ပာယ်´ ခေတ်ပေါ်ကဗျာစာအုပ်ကို ထုတ်ဝေခဲ့သည်။ သူ၏ ပုံနှိပ်ကဗျာဖြတ်သန်းမှုမှာ ကျွန်တော့်ထက် စောသည်။ တနည်းအားဖြင့် ပြောရလျှင် ကဗျာဝါကြီးသည်။ သို့သော် ကျွန်တော်က ယခုအခါ ချစ်စရာဇနီးနှင့် ငါးနှစ်အရွယ်သမီးလေးတစ်ယောက် ပိုင်ဆိုင်ထားပြီဖြစ်သည်။ တနည်းပြောရလျှင် သူ့ထက် အိမ်ထောင်သက်ဝါကြီးနေပြီ။ သူ့ခမျာ ယခုအချိန်ထိ ကြေကွဲစရာ အချစ်ဇာတ်လမ်းတွေကို မလိုချင်ဘဲ ပိုင်ဆိုင်နေရဆဲ။ ချစ်ခြင်းဖွဲ့ကဗျာတွေ တစ်ပုဒ်ပြီး တစ်ပုဒ် ထပ်တိုးရေးဖွဲ့ဖြစ်နေဆဲ။ ချစ်ခြင်းတရားက ပေးသည့် နူးညံ့ညွှတ်နူးဖွယ် ဒဏ်ရာအနာဖေးများကို ပွတ်သပ် ဖဲ့ကစားရင်း နာကျင်မှုကို ခံစားလို့ ကောင်းနေဆဲ။ ထိုအထိ ကျွန်တော်လက်ခံပေးလို့ရသည်။ ကျွန်တော် လက်မခံချင်သည့် ကိစ္စမှာ ကဗျာစာအုပ်ခေါင်းစဉ် ဖြစ်သည်။
ဆရာ ပိုင်စိုးဝေက `မိဝင်းဖတ်ဖို့´ ကဗျာတွေ ရေးခဲ့သည်။ မောင်ကြည်သာ(တောင်တွင်း)က `ညီမလေး´ဟု တခမ်းတနား သိုသိုသိပ်သိပ်ဖွဲ့သည်။ မောင်သိန်းဇော်က ` ခင်´သည် ကျွန်တော်၏ အဖျား ငွေ့ငွေ့လေးဖြစ်သည်ဟု ညည်း သည်။ စံညိမ်းဦးက `တမိုးသားလုံး အေးပြည့်ပြည့်´ဟု ကြုံးဝါးသည်။ လင်းခါးကတော့ `မမြက ဘယ်မှာလဲ မမြရေ ဘယ်မှာ လဲ မမြရေ မြရေ´ ဟု သွေးရူးသွေးတမ်း ရှာဖွေသည်။ တေးခက်က `မသေနိုင်သေးတဲ့အချစ်နဲ့ နေရထိုင်ရတာ အရင်က ထက်တော့ သက်သာလာတယ် စူဇန်´ ဟု ဖြေတွေးသည်။ ညံလင်းကတော့ `လမ်းကြားလေးထဲ ရောက်တိုင်း ဖြူ အနံ့ရတယ်´ ဟု ရှူရှိုက်သည်။ နေညိုအောင်ကျမှ ဘာဖြစ်လို့ `နှင်း´`မြ´`မြ´`အေး´`ရည်´ `စိမ့်´`စမ်း´`လွင်´ ဖြစ်ရ တာလဲ။ `နှင်း´ တစ်ယောက်တည်း၊ `မြ´ တစ်ယောက်တည်း၊ `မြ´ တစ်ယောက်တည်း၊ `အေး´ တစ်ယောက်တည်း၊ `ရည်´ တစ်ယောက် တည်း၊` စိမ့်´ တစ်ယောက်တည်း၊ `စမ်း´ တစ်ယောက်တည်း၊ `လွင်´ တစ်ယောက်တည်း မဖြစ်ခဲ့ရ တာလဲ။ ကျွန်တော့်မေးခွန်းများဟာ ကျွန်တော် သိချင်စိတ်များနှင့်အတူ နှင်းမြမြအေးရည်စိမ့်စမ်းလွင် ရှိရာသို့ အရောက် သွားခဲ့မိတော့သည်။

`ကြေကွဲခြင်းဟာ နာမည်ပျက်ပြီပေါ့
ကြောက်စိတ်ဟာ ကြောက်ရွံ့စွာ ခေါင်းငုံ့နေရပြီပေါ့
နှုတ်ခမ်းတွေ လှုပ်တယ်ဆိုရုံ
နှုတ်ခမ်းတွေ လှုပ်တယ်ဆိုရုံလေး
နတ်ဆိုးတွေ မမြင်အောင် ငါပြုံးမိပါရဲ့ နှင်း´
(နှင်း ကဗျာမှ)

 `နှင်း´သည် သူ့အတွက် ပထမဦးဆုံးသောအချစ်ဇာတ်လမ်းတစ်ပုဒ်လား။ `နှင်း´နှင့် သူ၏အချစ်ဇာတ်လမ်းသည် ကြည်နူးဖွယ်ရာများနှင့် စတင်ခဲ့သည်။ သူနှင့် `နှင်း´၏ ကြားတွင် ကြေကွဲခြင်းသည် နာမည်ပျက်သွားသည်။ တစ်ယောက်ကို တစ်ယောက်ဆုံးရှုံးမှာ ကြောက်သည့်စိတ်များသည် သူတို့နှစ်ယောက်ကြားတွင် ခေါင်းငုံ့တိုးလျှိုးနေရသည်။ ချစ်ခြင်းကိုမှ ဖျက်ဆီးတတ်သည့်နတ်ဆိုးတွေ မမြင်အောင် ကဗျာဆရာသည် နှင်းကို လုံခြုံအောင် ကွယ်ဝှက်သိမ်းဆည်းပေးနိုင်ခဲ့သည်။ ကဗျာဆရာ၏ ချစ်ခြင်းအစအမွန်သည် ပျော်ရွှင်စရာအတိဖြင့် အဆုံးထိလှပနေခဲ့သလို။

`လူတစ်ယောက်ရင်ကွဲဖို့
ဓါးတစ်လက်မလိုအပ်ခဲ့ပါဘူး ချစ်မေတ္တာ
အကြောင်းအကျိုးဆင်ခြင်နိုင်တဲ့စိတ်က
သူ့နာမည်လေး ကြားရုံနဲ့
ခြေဖျားလက်ဖျားတွေ အေးစက်
တုန်ရင်ချိနဲ့ ဖြစ်တယ်ဆိုရင်တော့ လွန်တာပေါ့´
(မြ ကဗျာမှ)

 အပြောင်းအလဲက မြန်သည်။ ကဗျာဆရာ၏ နှုတ်မှ တဖွဖွ ရွတ်ဆိုနေသည့်အမည်သည် `နှင်း´ မဟုတ်တော့။ `နှင်း´ ဘယ်ရောက်သွားပြီလဲ။ `နှင်း´ ပျောက်သွားပြီး `မြ´ ရောက်လာသည်။ `မြ´သည် `နှင်း´ထက်ပို၍ အေးမြစေ ခဲ့ပြီလား။ ကျွန်တော်ထင်မြင်ချက်များ မှားပြီဆိုတာ ကဗျာအစမှာတင် သိလိုက်ရသည်။ `မြ´သည် ကဗျာဆရာ၏ နှလုံးသား ကို ချစ်ခြင်းမေတ္တာဖြင့် ထိုးခွဲပစ်ဖို့ ကြိုးစားနေပြီ။ ကဗျာဆရာသည် `မြ´ဆိုသည့် အမည်နာမကို ကြားရုံမျှဖြင့် တုန်ရင်ချိနဲ့လို့။ `နှင်း´နှင့် အေးမြခဲ့သော ကဗျာဆရာ၏ နှလုံးသားသည် `မြ´လက်မှာ ချွန်မြသည့် ရေခဲလက်များဖြင့် ထိုးချေ ဖျက်ဆီးခံလိုက်ရသည်။ ကဗျာဆရာ၏ ညနေခင်းများသည် မူးယစ်ထုံပြင်းသော ရနံ့များဖြင့် မွန်းကျပ်ပူလောင်ခဲ့ရသည်။

`ရာသီနဲ့ နာရီက
တားလို့ မရစကောင်းဘူး မြ
ဒီမှာ
မင်းမမြင်နိုင်တဲ့သစ်ရွက်တွေ ကြွေနေပြန်ပြီ
မင်းမကြိုက်တဲ့ ငါ့အိပ်မက်တွေလည်း ရှည်နေပြီကောကွယ်´
( မြ ကဗျာမှ)

 `မြ´ပြီးတော့ `မြ´ထပ်လာသည်။ ယခု `မြ´သည် အရင်က `မြ´ထက် ပိုထက်ရှကြေကွဲစေမည်မှန်း ကဗျာဆရာ မသိခဲ့လေရော့သလား။ တခါသေဖူး ပျဉ်ဖိုးနားမလည်သေးသည့် ကဗျာဆရာ `မြ´ချစ်ခြင်းတရားရှေ့မှောက်တွင် သစ်ရွက် ကြွေလို ဒူးထောက်ခစားရပြန်ဦးတော့သည်။ တရံတခါဆီက အနမ်းတို့သည် ဘယ်ဝယ်ဘယ်ဆီထိ လွင့်မျောသွား လေပြီ မသိတော့။ အရာရာထိစပ်ပတ်သက်ခဲ့သမျှ မြောက်ပြန်လေ တသုန်သုန်အဖြူးမှာ အရူးတစ်ယောက်လို နာကျင်ခံစားရ ပြန်ဦးတော့မည်။

`ငါတို့ရွေ့လျားခဲ့ခြင်းက
တစ်ယောက်ယောက်ကို ထိခိုက်နစ်နာစေဖို့လား
ဒါမှမဟုတ်
နှစ်ယောက်စလုံး လောင်ကျွမ်းပြာကျဖို့လား
စွန့်လွတ်ဖို့ ခက်တဲ့ ကမ္ဘာမှာ
အမှန်တရားဟာ
ပန်းအ၀ါလေးတစ်ပွင့်အဖြစ်
အယောင်ဆောင်ကြွေကျခဲ့ဖူးတယ်´
( အေး ကဗျာမှ)

 ချစ်ကံခေသူတို့လမ်းသည် ဆူးကြမ်းများဖြင့် အပြည့်ခင်းထားသည်။ ကျောခိုင်းထွက်ခွာဖို့ ကိုယ့်ကိုယ်ကိုယ် ခွင့်မပြုနိုင်ခြင်းက ဒဏ်ရာကို နှစ်ထပ်တိုးဖြင့် ပိုမိုဆိုးရွားစေလွန်းသည်။ ကံကြမ္မာသည် အသည်းကွဲကဗျာဆရာသွားရာ ဓားလိုက်လို့ မိုးပေးသည်။ ခေါင်းမော့ရင်လည်း အသွားတလက်လက်၊ ခေါင်းငုံ့ထားရင်လည်း သွေးတစက်စက်နှင့် အမှောင်ထဲမှာ ပွင့်တဲ့ ပန်းခမျာ ဘယ်လို အချစ်နတ်ဘုရားမှ မြင်နိုင်ရန် မစွမ်းသာခဲ့ဘူး ထင်ပါသည်။ သွေးမတိတ်သေးသည့် အရင်ဒဏ်ရာဟောင်းများနေရာတွင် သွေးစိမ်းရှင်ရှင် ထပ်ထွက်သည်။ ယခုထွက်သည့် သွေးသည် တစ်ဖက်ဓားသွားကြောင့် မဟုတ်၊ နှစ်ဖက်ဓားသွားကြောင့် ပိုပြတ်ရှခဲ့ရသည်။ `အေး´။ `နှစ်ယောက်စလုံးလောင်ကျွမ်းဖို့ ငါတို့ ဘာကို စတေးကြမလဲ´ ဟု ကဗျာဆရာ ငိုကြွေးခဲ့ပါသေးလား။

`နာကျည်းခြင်းဟာ
ဘယ်သူ့အနားမှာ အိပ်ပျော်နေခဲ့သလဲ
ညဥ့်ဦးယံ
အားလုံးတိတ်ဆိတ်သွားခဲ့ပေမယ့်
ချစ်မေတ္တာက
ငါ့ရဲ့အနားမှာ မတ်တပ်ရပ်နေတုန်းပဲ´
( ရည် ကဗျာမှ)

 အချိန်များ တရွေ့ရွေ့ပြောင်းလဲခဲ့ပြီ။ ရင့်ကျက်မှုသည် တကောက်ကောက်လိုက်ပါနေသည့် အရိပ်တစ်ခုလို ကဗျာဆရာ၏ ရင်ကို အနည်းငယ်တော့ သက်သာစေခဲ့ပြီ ထင်သည်။ ကဗျာဆရာ၏ သံဝေဂသည် ပန်းလေးတစ်ပွင့်၏ ဖူး၊ ပွင့်၊ ကြွေ ဖြစ်တည်ဆဲ ခဏငယ်များအပေါ်တွင် သာယာမိန်းမောလို့ မနေတော့တာ သေချာသည်။ မပျော်ရွှင်ခြင်းများနှင့် နေသားကျနေသော နေ့ရက်များသည် ကိုယ်နှင့် ငယ်ပေါင်းကြီးဖော်လို၊ သောက်ဖော်စားဖက်လို၊ ဆိုးဖော်မိုက်ဖက်လို။ တခါတရံ ချစ်ခြင်းတရား ကို လိုအပ်သည့်နေ့များလည်း ရောက်ရှိလာပါလိမ့်ဦးမည်။ သူ့နာမည်ကို `ရည်´ ဟု မှတ်လိုက်ပါ။

`လက်တွေဟာ
တခြားတစ်ယောက်ရဲ့ ဒုက္ခတွေကို ကူညီဖို့ပါ
အနမ်းတွေကတော့
နှလုံးသားအခန်းငယ်လေးထဲ
သိမ်းဆည်းထားဖို့ပါ
သင် ၀မ်းနည်းကြေကွဲနေတဲ့အခါ
ရေရွတ်ကြည့်လိုက်ပါ
သူ့နာမည်က ချစ်မေတ္တာ´
(စိမ့် ကဗျာမှ)

 ကဗျာဆရာသည် လူငယ်ဘ၀မှ လူလတ်ပိုင်းဘ၀သို့ ကူးပြောင်းလာပြီ။ လက်မောင်းပေါ်တွင် ရေးထိုးထားသော တက်တူးတစအပေါ်တွင် အရူးအမူးတွယ်တာနေသည့်စိတ်ကတော့ မပြောင်းလဲသေး။ ရရှိခဲ့သော ချစ်ခြင်းမေတ္တာတို့ အပေါ် တွင် အကြိမ်ကြိမ်အထပ်ထပ် ကျေနပ်မွတ်သိပ်ခဲ့ပြီးပြီ။ မရရှိခဲ့သော ချစ်ခြင်းမေတ္တာတို့အပေါ်တွင် အဖန်ဖန်အလဲလဲ ပြိုကွဲ ယိုင်လဲခဲ့ပြီးပြီ။ ဖြတ်သန်းခဲ့ဖူးတဲ့ လူငယ်ဘ၀ဆိုတာ ပျော်ရွှင်စရာထက် ကြေကွဲစရာများခဲ့တယ်ဆိုရမလား။ ဒီဇာတ်လမ်းမှာ မြက်ပင်ကလေး၊ စတော်ဘယ်ရီသီးတွေနဲ့ ချန်ထားခဲ့လို့ မရသည့် ဇီဇ၀ါပန်းများ။ မေ့ထားခဲ့လို့ မရနိုင်သည့် ရေဒီယို အမည်းရောင်လေးနှင့် နိုဝင်ဘာမိုးတိမ်။ သိမ်းဆည်းထားဖို့ရာ နှလုံးသားအခန်းငယ်လေးတစ်ခုတော့ ရှိတာကို သူ သိသည်။ `စိမ့်´ဟု ရေရွတ်ကြည့်လိုက်ပါ။ ချစ်ခြင်းမေတ္တာလို့ အသံထွက်လာပါလ်ိမ့်မည်။

`နေ့လည်ခင်းစိတ်ကူးတစ်ခု
ငါ စိုက်ပျိုးထားတယ် ကဗျာ
မင်းအဆင်ပြေသလို ရိတ်သိမ်းပါ
ဒီဇာတ်လမ်းမှာ
တန်ပေါင်းသုံးရာ့ခြောက်ဆယ်လောက်ရှိတဲ့ အရာတစ်ခုကို
ယုံကြည်မှုဆိုတဲ့
ကြိုးလေးတစ်ချောင်းတည်းနဲ့
ငါ ချည်နှောင်ခဲ့တာပါ´
(စမ်း ကဗျာမှ)

 မဖြစ်နိုင်မှန်းသိလျှက်နှင့် ရူးမိုက်ခဲ့သည် ကဗျာဆရာတစ်ယောက်၏ နောက်ပိုင်းဇာတ်ထုပ်သည် ငိုချင်းများဖြင့် ကန့်လန့်ကာ ချလိုက်ရတော့မည်။ မမှီနိုင်သော သစ်ပင်ပေါ်မှာ သစ်သီးကို ချဉ်သည်ဟု ကဗျာဆရာသည် ဘယ်တော့မှ မပြောခဲ့။ အဘယ်ကြောင့်ဆိုသော် ကဗျာဆရာသည် မြေခွေးတစ်ကောင် မဟုတ်ခဲ့သောကြောင့် ဖြစ်သည်။ နူးညံ့ သိမ်မွေ့မှုသည် အဝေးက ငေးကြည့်နေခွင့်ရတာလေးတစ်ခုတည်းနဲ့တင် ရင်မှာဖွဲ့တည်ကိန်းဝပ်လာစေခဲ့သည်။ ပျော်ရွှင်ပါ။ ကြည်နူးပါ။ ၀မ်းမြောက်ပါ။ ချိုမြိန်သစ်သီးများနဲ့ လတ်ဆတ်သော ရွက်သစ်များကို စားသုံးပါ။ နွေးထွေးသော အိပ်ရာပေါ်မှာ အိပ်စက်ပါ။ ကောင်းမွန်မြင့်မြတ်သော အိပ်မက်များကို မက်ပါ။ ဆုတောင်းခန်းမဟာ ထိုထိုသော ကဗျာရွတ်သံများဖြင့် ဖုံးလွှမ်းနေပါစေ။`စမ်း´။ `ရေလို အေးပါစေ ပန်းလို မွှေးပါစေ´။ ချစ်ခြင်းတရားအပေါ် ယုံကြည်သက်ဝင်မှုက ဘာသာတရား တစ်ခုလို ကဗျာဆရာကို ရဲဝံ့စေခဲ့လွန်းပါသည်။

`အရင်လို
ပေါက်ပြားတွေနဲ့ မရတော့ဘူး
ဦးညွှတ်ပြီးပြီပဲ
ရည်စူးပြီးပြီပဲ
ဘယ်လိုရေတွင်းပျက်တွေကို
ဆယ်ယူရဦးမလဲ´
( လွင် ကဗျာမှ)

 ခဲမှန်ဖူးသော စာသူငယ်သည် ခဲ ရှိရာ အရပ်သို့ နောက်တစ်ကြိမ်မပျံသန်းတော့ပေမယ့် ကဗျာဆရာကတော့ အခါခါ ပြုတ်ကျဖူးသည့် သားရဲတွင်းကိုမှ အခါခါ ခုန်ဆင်းချင်နေသည့် သူရဲကောင်းဖြစ်သည်။ ကဗျာဆရာ၏ မာနသည် ချစ်ခြင်း တရား၏ အောက်တွင် ဒူးထောက်အရှုံးပေးဦးညွှတ်ရန် နှစ်ခါပြန်စဉ်းစားစရာမလိုအပ်ခဲ့။ `ရေကြည်သောက်ချင်လို့ ဆင်းခပ် ခဲ့တာပါ´ ဟူသောအသံကို ရေတွင်းပျက်၏ အောက်ခြေမှ ကြားလိုက်ရသည်။ ကျိန်စာသင့်ခဲ့သော အော်သံသည် ကဗျာ ဖတ်သူထံသို့ အဝေးကနေ ထိုးဖောက်ဝင်ရောက်ရန် ပျံသန်းလာချေပြီ။ နားများကို ပိတ်လိုက်ပါ။ မျက်လုံးများကို မှိတ်လိုက်ပါ။ ပြီးခဲ့သည့်အတိတ်ကို အစကနေ ပြန်ရေးလျှင် `နှင်းမြမြအေးရည်စိမ့်စမ့်လွင်´ဆိုသည့် ကဗျာစာအုပ် တစ်အုပ် ဖြစ်လာပါလိမ့်မည်။ နားများကို ပြန်ဖွင့်လိုက်ပါ။ မျက်လုံးများကို ဖွင့်ကြည့်လိုက်ပါ။ နှင်းမြမြအေးရည်စိမ့်စမ်းလွင်သည် ချစ်စဖွယ်အမူအယာဖြင့် ပြုံးကြည့်နေသည်ကို တွေ့ရပါလိမ့်မည်။
 နေညိုအောင်၏ အချစ်ကဗျာများကို ဖတ်ရသည့်အခါ တစ်စုံတစ်ယောက်က ညင်ညင်သာသာ တီးတိုးစကား ပြောနေသလို ခံစားရသည်။ စကားလုံးရွေးခြယ်မှု၊ အသံ အဖြတ်အတောက်နှင့် လိုင်းစီပုံ၊ ခေတ်ပေါ်ကဗျာ၏ အသက် ဓာတ်ဖြစ်သည့် စကားပြောရစ်သမ်၊ စကားလုံးချိတ်ဆက် ဖွဲ့ယူပုံကောင်းခြင်း၊ စုစည်းပြေပြစ်မှုရှိခြင်းများကို ခံစား ရသည်။ ကဗျာဖတ်သူသည် ကဗျာတစ်ပုဒ်ကို ဖတ်နေရင်းနှင့် ကဗျာဆရာနှင့် သူ့ဇာတ်ကောင်အမျိုးသမီး နံဘေးရောက်သွားသလို ခံစားရသည်။ ကဗျာဆရာ၏ ကြေကွဲခံစားမှုသည် ကဗျာဖတ်သူထံသို့ တနည်းနည်းဖြင့် ကူးစက်နေသည်။ နေညိုအောင်၏ ကဗျာများတွင် ရင့်သီးသော စကားလုံးများမပါ။ သူ့ပြင်ပ ပင်ကိုယ်လက္ခဏာအတိုင်း သူ့ကဗျာများသည် အေးဆေး ညင်သာစွာ စီးဆင်းနေသည်။ ကဗျာဆရာ၏ ရိုးသားမှု၊ ချစ်ခြင်းတရား၊ အကောင်းမြင်စိတ်နှင့် ကြေကွဲနွမ်းလျမှုများအား ကဗျာတိုင်းတွင် အထင်းသား မြင်တွေ့ နေရသည်။ ကဗျာဖတ်နေရင်းနှင့် `နှင်း´`မြ´`မြ´`အေး´`ရည်´ `စိမ့်´`စမ်း´ `လွင်´သည် တစ်ဦးတည်းဖြစ်သွားသည်။
ယခု ကဗျာစာအုပ်သည် သူနှင့် နှင်းမြမြအေးရည်စ်ိမ့်စမ်းလွင် (သို့) သူ့ချစ်ခြင်းမေတ္တာ၏ အတ္ထုပတ္တိဖြစ်သည်။ ကဗျာဆရာသည် သူကြုံတွေ့ရသည့်၊ သူခံစားရသည့် ချစ်ခြင်းမေတ္တာကို အမည်နာမအမျိုးမျိုးဖြင့် ပြောင်းလဲ တင်ဆက်ခြင်း ဖြစ်သည်။ အမည်နာမ တစ်ခု ပြောင်းလိုက်လျှင် ဒဏ်ရာအနာ ပိုသက်သာမည်ဟု သူထင်မှတ်ထားခဲ့သည်။ သို့သော် သူ့ကြေကွဲမှုသည် အစွန်းရောက်နာကျင်မှုများအဖြစ် ပြောင်းလဲသွားသည်။ ချစ်ခြင်းမေတ္တာကို ကိုယ်ခွဲတွေ အများကြီးဖြင့် မြင်လာသည်။ သူသည် သူရူးတစ်ယောက်လို တစ်ယောက်တည်း စကားတွေ ပြောတော့သည်။ တခါတရံတွင် `နှင်း´နှင့်။ တခါတရံတွင် `မြ´နှင့်။ တခါတရံတွင် `အေး´နှင့်။ အဲဒီလိုနှင့် အထီးကျန်နေ့ရက်များကို ကဗျာတွေ ဖွဲ့ပြီး ပျော်ချင်ယောင် ဆောင်ခဲ့သည်။ ရေသန့်တစ်ဗူးနှင့် မလုံလောက်သည့် ညနေတွေကို ရီဝေယစ်မူးစွာ ဖြတ်သန်းကူးခတ်ခဲ့သည်။ သူသည် သူ့ခန္ဓာကိုယ်အနှံ့အပြားတွင် `နှင်းမြမြအေးရည်စိမ့်စိမ့်လွင်´၏ ပုံတူကို တက်တူးထိုးဖို့ ကြိုးစားသည်။ တကယ့်လက်တွေ့ တွင်မူ မဖြစ်နိုင်။ `နှင်းမြမြအေးရည်စိမ့်စမ်းလွင်´သည် အပြင်လောကမှာ တကယ်မရှိ။ တကယ်ရှိသည်မှာ ချစ်ခြင်း မေတ္တာသာ ဖြစ်သည်။ ချစ်ခြင်းမေတ္တာကို တက်တူးထိုးဖို့ ကြိုးစားသော သူရူးကို ကဗျာဆရာဟာ သမုတ်လျှင် ထိုကဗျာ ဆရာမှာ နေညိုအောင် သာ ဖြစ်သည်။ အချစ်ကို ချစ်တတ်ဖို့ ကြိုးစားနေသည့် ကဗျာဆရာ နေညိုအောင် တစ်ယောက် အချစ်ကဗျာများ ဆက်လက်ရေးဖွဲ့ရင်း ချစ်ခြင်းမေတ္တာနှင့် အမြန်ဆုံဆည်းပါစေဟု ကျွန်တော် ဆုတောင်းပေးလိုက်မိပါသည်။

မင်းနဒီခ
၆၊ ၁၀၊ ၂၀၁၅