ရန်ကုန်ရောက်ရောက်ချင်း
အနွေးထည်အရင်ချွတ်လိုက်ရတာပါပဲ
အပူက
အတွင်းကနေ အပြင်ကိုလာတယ်
ဆောင်းဟာ
နှင်းကို လူမသိသူမသိ ရွာချလိုက်သလိုမျိုး
ရန်ကုန်မြေပေါ် ကျွန်တော် ရောက်ရှိခဲ့ပေါ့
သူစိမ်းတစ်ယောက်ရဲ့ အကြည့်တွေ
ကျွန်တော့်ကိုယ်ပေါ် မြားတွေလို စိုက်ဝင်လာချိန်
ကျွန်တော်က
ရွတ်ခဲ့ဖူးတဲ့ ကဗျာတစ်ပုဒ်ရဲ့ အသံကို ရှာတယ်
မြင်မြင်လေရာ ဆက်သွယ်မှု ပြင်ပကမ္ဘာပါပဲ
အသံတွေ ကြားတယ် အရုပ်မမြင်ရဘူး
ပန်းတွေ ပွင့်တယ် ရနံ့ရှာမရဘူး
လမ်းတွေ တူတယ် လူချင်းမတွေ့ရဘူး
ဒီလိုနဲ့ ခပ်ကျပ်ကျပ်လမ်းမတွေပေါ်
ခြေတစ်လှမ်း စလှမ်းလိုက်တော့
အိမ်လွမ်းစိတ်က တစ်လက်မမြင့်တက်သွားတယ်
ရန်ကုန်
ရန်တွေ ကုန်ပါစေ အပြစ်တွေ ကြေပါစေ
လမ်းတွေ ဖြောင့်ပါစေ လူတွေ ဖြောင့်ပါစေ
ဆုတောင်းခန်းပြီးတဲ့နောက်
ကဗျာဆီ ရောက်ဖို့ ငါ ဘယ်ကားစီးရမလဲ
ဟွန်းသံကင်းမဲ့ဇုံမှာ
ခြေစုံရပ်ရင်း စောင့်နေမိပေါ့။
မင်းနဒီခ
၁၅ ဒီဇင်ဘာ ၂၀၁၃
မနက် ၅ နာရီ ၃၀ မိနစ်
( ရုပ်ရှင်တေးကဗျာ၊ မတ်လ၊ ၂၀၁၄)
No comments:
Post a Comment