"ဆံသဆရာပါးစပ်ထဲက သွားအတုတွေ"

"ဆံသဆရာပါးစပ်ထဲက သွားအတုတွေ"
---------------------------------------------------

ဆံပင်ညှပ်ဆိုင်ရှေ့မှာ လူတန်းကြီးက တော်တော်ရှည်နေပြီ
တန်းစီစနစ်တွေဟာ ဘယ်တုန်းကမှ ဒီကလူတွေနဲ့ အသားမကျခဲ့တော့
လူတစ်ချို့က လစ်ရင် လစ်သလို
ကိုယ့်ရှေ့က လစ်ဟာသွားတဲ့တစ်နေရာကို ချောင်းမြောင်းလို့
ဆံသဆရာဟာ လူတန်းကြီးကို ကြည့်ပြီး သက်ပြင်းကို ချတယ်
သူ ညှပ်ထားတဲ့ ဆံပင်တွေဟာ သူ့ခြေရင်းမှာ မည်းနက် ရှုပ်ပွလို့
ခေါင်းတွေ တခေါင်းပြီး တခေါင်းပြောင်းသွားတယ်
ဆံသဆရာရဲ့ လက်တွေဟာ ညောင်းညာကိုက်ခဲစပြုနေပြီ
လူတန်းကြီးဟာ တဖြည်းဖြည်းပိုပြီး ရှည်လာတယ်လို့ သူထင်တယ်
သူ့အင်္ကျီပေါ်မှာ ကပ်ငြိနေတဲ့ ဆံပင်အစအနတွေကို သူမခါထုတ်နိုင်သေးဘူး
လူတွေဟာ စိတ်မရှည်မှုများစွာနဲ့ ဆံသဆရာကို ငေးကြည့်နေကြတယ်
ဆံသဆရာဟာ တခုခုကို ဆုံးဖြတ်လိုက်သလို အံကို တင်းတင်းကြိတ်ပြီး ပြုံးလိုက်တယ်
ပြီးတော့ သူ့ရှေ့ရောက်နေတဲ့ လူရဲ့ ဆံပင်တွေကို စုကိုင်ပြီး
အဲဒီလူရဲ့ လည်ပင်းကို ထက်မြေ့နေတဲ့ ဓားအသစ်လေးနဲ့ တိတိရိရိ လှီးဖြတ်လိုက်တယ်
သွေးတွေဟာ ထိုင်ခုံခြေရင်းက ဆံပင်တွေဆီ ပန်းထွက်သွားတယ်
ဆံပင်ညှပ်ဖို့ စောင့်နေတဲ့ လူတွေက ဆံသဆရာကို တအံ့တသြငေးကြည့်နေကြတယ်
နောက် စိတ်မရှည်စွာ ကျွတ်တသပ်သပ်လုပ်ရင်း အလှည့်ရောက်ဖို့ စောင့်မြဲစောင့်ကြပြန်တယ်
ဆံသဆရာဟာ သူ့လက်ထဲက ဦးခေါင်းကို ဆံပင်တွေထည့်ထားတဲ့ အမှိုက်ခြင်းထဲ ပစ်ထည့်ုလိုက်တယ်
ရှေ့ဆုံးက တန်းစီသူဟာ ထိုင်ခုံပေါ်က ခေါင်းမပါတဲ့လူကို ဆွဲဖယ်ပစ်လိုက်တယ် စိတ်မရှည်စွာ
ဆံသဆရာဟာ ခြုံလွှာအသစ်တစ်ထည်ကို အဲဒီလူအပေါ်လွှမ်းခြုံလိုက်ပြီး
တံဆိပ်မခွာရသေးတဲ့ ဓားအသစ်တစ်လက်ကို ပြတယ်
ဓားဟာ နေရောင်မှာ ဖျတ်ကနဲ တလက်လက် ထတယ်
ထိုင်နေသူဟာ ခေါင်းကို တညိတ်ညိတ်နဲ့ အသိအမှတ်ပြုလိုက်တယ်
တန်းစီသူတွေဟာ အခုထိ တဖြည်းဖြည်းရောက်လာနေတုန်းပဲ
ဆံသဆရာဟာ စိတ်ညစ်ညူးမောပန်းစွာ ပြုံးလိုက်ပြန်တယ်
ဘယ်သူမှတော့ မတွေ့လိုက်ဘူး
ဆံသဆရာရဲ့ ပါးစပ်ထဲမှာ သေသူဆီက ချွတ်ယူထားတဲ့ သွားအတုတွေ။

မင်းနဒီခ
၂၉၊ ၃၊ ၂၀၁၆