အဲဒီကျွန်းမြို့လေးပေါ်က
တီဗီဖန်သားပြင်ကြီးပေါ်မှာ အခု လာနေတဲ့ ဒရာမာဇာတ်လမ်းတွဲ
၂၀၀၅ ဝန်းကျင် ကျွန်တော်
ကဗျာစရေးတုန်းက မောင်ယုပိုင်ရဲ့ “ သားအဖ ဂစ်တာ” ကဗျာက အရမ်းကြိုက်လို့
မှတ်စုစာအုပ်ထဲမှာ ကူးရေးခဲ့ဖူးတယ်။ ဒီကဗျာကို အခုအချိန်ထိ မှတ်လည်းမှတ်မိနေပါတယ်။
ဖခင်တစ်ယောက်ရဲ့ သားအပေါ်ထားတဲ့ စိုးရိမ်ပူပန်မှုနဲ့ သားတစ်ယောက်ရဲ့ တဇွတ်ထိုး စွန့်စားလိုစိတ်တွေဟာ
အရွယ်ရောက်စလူငယ်တွေ တော်တော်များများ ကြုံတွေ့ခဲ့ရဖူးပါလိမ့်မယ်။ ကဗျာနဲ့
တိုက်ဆိုင်မိကြပါလိမ့်မယ်။ ကဗျာတစ်ပုဒ်ရဲ့ အတွင်းစာသားထဲက နေ
သားအဖနှစ်ယောက်ဖြတ်သန်းခဲ့ရတဲ့ခေတ်၊ သားအဖနှစ်ယောက်ရဲ့ အနုပညာတစ်ခုအပေါ်မှာအမြင်ကွဲပြားမှု၊
ရူးသွပ်မှု ကိုယ်စီမှာ ရင့်ကျက်မှုနဲ့ မိုက်ရူးရဲဆန်မှု၊ ပြီးတော့ စကားလုံး ကျစ်ကျစ်လစ်လစ်နဲ့
ကဗျာတစ်ပုဒ်ကို ရုပ်ရှင်ဇာတ်လမ်း တစ်ပုဒ်လို မျက်စိထဲ မြင်ယောင်လာအောင်
ရေးဖွဲ့နိုင်စွမ်းဟာ တခါဖတ်ပြီး ဘယ်တော့မှ မေ့မပစ်နိုင်လောက်အောင်ပါပဲ။
“
ဓာတ်ပြားဟောင်းကြီးဖွင့်ချလိုက်ရင်
ကွန်ဆာဗေးတစ်သီချင်းတွေပဲ
ထွက်ကျလာမှာ သိတယ်
လိုအပ်ရင်
ခုနှစ်ကြိုးတပ်တီးပြီး
မလိုအပ်ရင်
ရိုက်ချိုးချင် ရိုက်ချိုးလိုက်မယ်
ဒါ . .
.ကျွန်တော်တို့ခေတ်ရဲ့ လောကဓံကို
စည်းလိုက်နေတာပဲ
အဖေ
ကျွန်တော်ကတော့
အနုပညာလှေဆိပ်မှာ
ဂစ်တာတွေဆုံရင်
ကြယ်တွေဆီ
ရွက်လွှင့်ကြမယ်ပေါ့
အဲဒါကို အဖေက
မှောင်ရိပ်ခိုကျွန်းမှာ
ပင်လယ်ဓားမြတွေဆုံရင်
တစ်ယောက်နဲ့တစ်ယောက်
ဝိုင်ခွက်ချင်းတိုက်
ပင်လယ်နက်ထဲ
ခုန်ချကြတော့မယ် တဲ့
ကျွန်တော်
ထွက်လာခဲ့တယ်
လက်နက်အပြည့်နဲ့
ဂစ်တာအိတ်ကိုလွယ်လို့(ဒစ်စပရာဒို မင်းသားလို)
ထရပ်ကားသံ
တညံညံနဲ့ ကောင်းဘွိုင်တွေများတဲ့ မြို့ကြီးကို
အဖေဟာ
ဒေါက်တာဇီဗားဂိုးရဲ့
ဇာတ်ဝင်တေးကို လေချွန်ရင်း
ဆောင်းရာသီသစ်ကိုင်းခြောက်တွေကြားမှာ
နေရစ်ခဲ့”
(သားအဖ ဂစ်တာ ကဗျာမှ)
နောက်
၂၀၀၇၊ ဖေဖော်ဝါရီလမှာ မောင်ယုပိုင်ရဲ့ ပထမဆုံးကဗျာစာအုပ် “ အဲဒီကျွန်းမြို့လေးမှာ
မြေပုံအပြောင်း အလဲနဲ့” ထွက်ရှိလာပါတယ်။ အဲဒီကဗျာစာအုပ်ဟာ ကျွန်တော်လက်စွဲ
ကဗျာနှိုးစက် စာအုပ် တစ်အုပ်ဖြစ်ခဲ့ပါတယ်။ ဆရာ ဇေယျာလင်းရဲ့ “ကဗျာရေးသူကို
ထုတ်လုပ်ခြင်း”၊ ဆရာခင်အောင်အေးရဲ့“ကင်းရှင်းတဲ့စိတ်ရဲ့ နှုတ်တိုက်ချပေးမှု
စာကြောင်းရေ ငါးဆယ့်လေး”၊ မောင်ယုပိုင်ရဲ့ “ အဲဒီကျွန်းမြို့လေးမှာ
မြေပုံအပြောင်းအလဲနဲ့” စတဲ့ စာအုပ်တွေဟာ ခေတ်ပေါ်ကနေ ခေတ်ပြိုင်စပ်ကူးမတ်ကူးကာလမှာ
ကျွန်တော့်အတွက် အရေးပါခဲ့တဲ့စာအုပ်တွေပဲ ဖြစ်ပါတယ်။ မောင်ယုပိုင်ရဲ့
“အဲဒီကျွန်းမြို့လေးမှာ မြေပုံအပြောင်းအလဲနဲ့” ကဗျာစာအုပ်မှာ ‘ အခိုးရိုက်မှန်ပြတင်းရဲ့ တဖက်တစ်ချက်’၊ ‘ပုံနှိပ် ထုတ်ဝေခြင်းမပြုမှီ
ငါ့အရေးအသား’ လို စကားပြေကဗျာတွေ၊ ‘လောကီရေးရာ’၊
‘ တခြားစကြဝဠာတစ်ခုများ မြင်မိ သေးလား’ လို ကော်လာ့ဂ်ျကဗျာတွေ၊ ‘ငါ့အစ်ကို’၊ ‘သားအဖဂစ်တာ’၊ ‘နေ့များ’လို
အားကောင်းလှတဲ့ ခေတ်ပေါ်ကဗျာတွေ၊ ‘ဆင့်ကဲဖြစ်စဉ်’၊
‘ကွက်လပ်ဖြည့်ပါ/ ကွက်လပ်အပြည့်ပါ’၊
‘ပန်းကန်ပြားပျံ ဖြစ်ရပ်ဆန်းများ’ လို စမ်းသပ်ကဗျာတွေ စတဲ့ စတဲ့ကဗျာတွေနဲ့
ကဗျာစာအုပ်တစ်အုပ်လုံးဟာ တစ်ပုဒ်ဖတ်၊ တစ်ပုဒ်တွေး၊ ကဗျာအသစ်တစ်ပုဒ်
ပြန်ရေးကြည့်လို့ ရအောင် ကို ကျွန်တော့်အတွက် အရေးပါခဲ့တဲ့ စာအုပ်ပါပဲ။
“ ယနေ့ဘယ်အရပ်ကို
သွားမှာလဲ ယနေ့မသွားရင် မဖြစ်ဘူးလား
ကျက်သရေ
ဘယ်အရပ်မှာ နေသလဲ ယနေ့ကျက်သရေဘယ်လိုနေသလဲ
ပုဆိုးဝယ်မလား
ထမီဝယ်မလား အဝတ်အစားဝယ်မလား
ယနေ့
ဘာပစ္စည်းပေးမလဲ ရွှေကျီးသာတာ ဘယ်အရပ်ကလဲ
လက်သည်းပွင့်နေလား
ဆံပင်ကို နေ့တိုင်း ဆီလိမ်းသလား
ငွေချေးမလို့လား
တရားပြိုင် သွားမလို့လား
အသီးလိုသလား
အပွင့်လိုသလား စပါးကို ကျီသွင်းမလို့လား
မရောင်းရတဲ့ကုန်ရှိသလား
ပစ္စည်းပျောက်နေသလား
နမန္တာ
အခရာပိတ်အရပ်ကို မသွားနဲ့ ချမ်းသာချင်သလား သစ်ပင်စိုက်
. . . . . . . .
. . . . . . . . . . .”
(ကဗျာစ-ဆုံးကို
အာရှဦးကျော်၏ အခါပေးကြေးမုံစာအုပ်မာတိကာမှ ကောက်နှုတ်အသုံးပြုသည်။
(လောကီရေးရာ ကဗျာမှ/ အဲဒီကျွန်းမြို့လေးမှာ မြေပုံအပြောင်းအလဲနဲ့
ကဗျာစာအုပ်)
“ ဇာတိမြေကို
ပြန်ရောက်တဲ့အခါ ကွက်လပ်မှုကို ခံစားရ
ရထားပြတင်းက
ကြည့်တဲ့အခါ ကွက်လပ်ကလေးတွေကို မြင်ရ
လသာတဲ့တစ်ညမှာ
ကွက်လပ်အရသာ
နွေရာသီကျောင်းပိတ်ရက်မှာ
ကွက်လပ်တွေ ဖြစ်နေမိ
ပွဲတော်
အချိန်အခါရောက်တိုင်း ကွက်လပ်စိတ်တွေ ဝင်လာ
အတိတ်ကို
ပြန်လည်တွေးတိုင်း ကွက်လပ်တွေသာ မြင်ယောင်လာမိ
လူငယ်ဘ၀ကုန်ဆုံးလွန်မြောက်လာပြီးနောက်
ကွက်လပ်ဘဝရောက်လာ
ကွယ်လပ် ငယ်ဘဝတွေ
ကွက်လပ် ဓာတ်ပုံတွေ”
(ကွက်လပ်ဖြည့်ပါ/ကွက်လပ်အပြည့်ပါ ကဗျာမှ/ အဲဒီကျွန်းမြို့လေးမှာ
မြေပုံအပြောင်းအလဲနဲ့ ကဗျာစာအုပ်)
အဲဒီနောက်
၂၀၀၉၊ ဇွန်မှာ ဒုတိယမြောက်ကဗျာစာအုပ် “တီဗီဖန်သားပြင်ကြီးဖွင့်လျှက်” ထွက်ရှိလာပါတယ်။
အဲဒီကျွန်းမြို့လေးမှာ ပြောင်းလဲဖို့ စမ်းသပ်အားထုတ်ခဲ့တဲ့ မောင်ယုပိုင်ဟာ
တီဗီဖန်သားပြင်ပေါ်မှာတော့ ပိရိသေသပ်တဲ့ ခေတ်ပြိုင်ကဗျာ လက်ရာတွေကို
ဖွင့်ပြနိုင်ခဲ့ပါတယ်။ ‘မြိတ်မြို့တွင်
ပြုလုပ်သည်’၊ ‘မနေ့ညက မြို့စွန်ဘက်မှ ပန်းကန်ပြားပျံ တစ်စီးတွေ့လိုက်တယ်’၊ ‘မြွေ’၊
‘စတီဗင်စပီးဘာ့ခ်အပြာ’၊ ‘နှိုး နှိုး နိုး နိုး’၊ ‘နောက်ထပ်နေ့များ’၊’ ဟုတ်တယ်
သေချာတယ် ငါ ဖြစ်တယ်’ စတဲ့ ကဗျာတွေဟာ တီဗီဖန်သားပြင်ပေါ်မှာ အကြိမ်ကြိမ်အခါခါ
ဖွင့်ကြည့်မိတဲ့ ချယ်နယ်လိုင်းများပါပဲ။
“ ရေးတော့မြိတ်၊
ဖတ်တော့ ဘိတ်၊ ဘိတ် ??? ဘိတ်ဆုံးမှာ နေတာလား
ဘိတ်မှာ
ဆုံးနေတာလား
တစ္ဆေခြောက်သောအိမ်ကြီးနဲ့
မြို့ရဲ့လသာဆောင်မှာ ဆင်မြူရယ်ဝှိုက်ရဲ့ ဖြူဖြူသဏ္ဌာန်အရိပ်တွေ
အချို့နိုင်ငံခြားသားတွေ
မြေပုံထဲမှာ ပြန့်ကျဲနေတဲ့ အမည်မဲ့ကျွန်းတွေ
အချို့တွေရဲ့
မြေပုံထဲမှာ (ခဲတံချွန်ထိပ်ဖျားလေးနဲ့ တစ်ထောက်စာ)နေရာလေးမှာ
ဘိတ်သားတစ်ချို့တောင်
မသိတဲ့ ‘မာဂွီး’ လို့ ရေးထားတယ်
ထင်ရှားသော
အလောင်းမင်းတရားအမာရွတ်နဲ့ တောင်တန်းတွေ
က
အသားနည်းနည်းညိုသလိုပဲနော်
ရေမြေကလည်း
နည်းနည်းစိမ်းနေသေးတယ်၊ ဘာသာစကားတဝဲဝဲ
မှတ်ပုံတင်အမှတ်-
ငပိမျဉ်းစောင်းဟွန်ဒါယဉ်ကျေးမှု(မှတ်သားဖွယ်ရာမိုးရေချိန်)ရေလုပ်ငန်း
ကော့သောင်းနဲ့
ထားဝယ်ဆိုတာ ဒီနားလေးတင်ပါ၊ ရှပ်ပြေးအမြန်ယာဉ်က
ပြောတယ်
ရထားဆိုတာ အလုံးလား အပြားလား”
(မြိတ်မြို့တွင်
ပြုလုပ်သည် ကဗျာမှ /တီဗီဖန်သားပြင်ကြီးဖွင့်လျှက် ကဗျာစာအုပ်)
“ အိပ်ယာက
နိုးတော့ ဟား ငါ ရန်ကုန်ရောက်နေတာပဲလို့၊ ဟုတ်တယ် မနေ့က
ရောက်တာ။ . . .
လေး ခြေတံရှည် မိုးကုပ်အောက်မှာ တည်လို့ အလွန်
ကြည်စိမ်းလဲ့လဲ့
ရေကန်သာ၊ ခုနက အိပ်မက် မက်နေတာပဲ၊ ရွာကို ပြန်ရောက်နေသလိုပဲ
ဘယ်ဟုတ်မလဲ၊ ငါ
ရန်ကုန်ရောက်နေပြီ။ (မိုးကလည်း ရွာမှ ရွာပဲ)၊ မနေ့က ရောက်တာ
အသေအချာပဲ၊
ညဘက်ဆို ဖယောင်းတိုင်မီးလေးတွေ မှိတ်တုပ်မှိတ်တုပ်နဲ့
ဘတ်စကားကြီးနောက်မှာ
မြင်းတစ်ကောင်ဖြတ်ပြေးသွားတာ မြင်လိုက်ရတလည်း
နံဘေးမှာ
ရန်ကုန်သား ကဗျာဆရာသာ သက်သေမရှိရင် ယုံမှာမဟုတ်ဘူး မြို့လယ်ခေါင်ရောက်နေတာလေ
မတွေ့ဘူးလား၊ မီးရထား
သံလမ်းလေးတစ်ခု၊ ရှည်လျားကွေ့ကောက်လို့
ချုံနွယ်ပိတ်ပေါင်းကြားပျောက်ကွယ်သွားတဲ့
ရထားသံလမ်းလေးတစ်ခု၊ ဒါပေမယ့် ရန်ကုန်ပါ”
(နှိုး
နှိုး နိုး နိုး ကဗျာမှ/ တီဗီဖန်သားပြင်ကြီးဖွင့်လျှက် ကဗျာစာအုပ်)
ဒီနေရာမှာ
တိုက်ဆိုင်လုိ့ မောင်ယုပိုင်ရေးခဲ့ဖူးတဲ့ ကဗျာဆိုင်ရာဆောင်းပါး “ ပို့စ်မော်ဒန် အယူသီးမှုအလွန် ငါ တကယ် အိပ်ချင်နေပြီ”
ထဲက စာပိုဒ်တစ်ပိုဒ်ကို ပြန်လည်ကောက်နှုတ်ဖော်ပြချင်ပါတယ်။ ဒီကောက်နှုတ်ချက်ကို
ဖတ်ကြည့်ရုံနဲ့တင် မောင်ယုပိုင်ရဲ့ ပို့စ်မော်ဒန်အပေါ်အမြင်ကို ခန့်မှန်းလို့
ရနိုင်မှာပါ။ မောင်ယုပိုင် ဟာ ဒီကဗျာဆိုင်ရာ ဆောင်းပါးမှာ သူရဲ့ ပို့စ်မော်ဒန်
အမြင်ကို ပြည့်ပြည့်စုံစုံရေးသားထားပါတယ်။ ဆောင်းပါးရေးတဲ့နှစ်ကို ၂၀၁၁ လို့
တပ်ထား ပေမယ့် ၂၀၀၉ ဝန်းကျင်တုန်းဆီက သူ့ရဲ့ ပို့စ်မော်ဒန်အပေါ်အမြင်နဲ့
သူပြုလုပ်ရေးဖွဲ့ထားတဲ့ ကဗျာတွေဟာ ထပ်တူကျ နေတာကို တွေ့ရမှာပါ။
“ ပို့စ်မော်ဒန်ကဗျာ ဖြစ်အောင် ပြုလုပ်ကြတယ်ဆိုတာ
နားလည်ရခက်သွားအောင် ပြုလုပ်ခြင်းနဲ့ မဆိုင်ပါဘူး။ ကဗျာဓာတ်၊ ကဗျာအရသာဟာ နည်းအမျိုးမျိုးနဲ့
နားမလည်အောင်ရေးဖွဲ့ခြင်း သက်သက်ထဲမှာ တည်မှီနေတာ မဟုတ်ဘူးလို့ ယူဆပါတယ်။ နားလည်ရ
ခက်ရုံနဲ့ ကဗျာဓါတ်ပေါက်မယ်၊ ပို့စ်မော်ဒန်ဖြစ်မယ်ဆိုရင်တော့ ကျွန်တော်တို့ ကဗျာ
ဖတ်မယ့် အစား သင်္ချာ ပုစ္ဆာတွေ ထိုင်တွက်၊ သိပ္ပံဘာသာရပ် ဖေါ်မြူလာတွေ ထိုင်တွေး၊
ဥာဏ်စမ်း ကစားနည်းတွေ ဘာသာစကားဆက်စပ်ကစားရတဲ့ ဆူဒိုခု ကစားနည်းတွေ
ထိုင်ကစားနေရုံပါပဲ။ (အလွန် လှပတဲ့ သင်္ချာတစ်ပုဒ်ဟာ ကဗျာဖြစ်တယ် ဆိုတဲ့ စကား
ရှိပါတယ်) ဥပမာ ဂျွန်အက်ရ်ှဘရီရဲ့ ကဗျာတွေမှာ အဆက်အစပ်ပြတ်တောက်မှုတွေ
ကြုံရာကျပန်းဆန်မှုတွေအများအပြားသုံးစွဲထားတာ တွေ့ရပေ မယ့် ဘာမှန်းမသိလောက်အောင်
ဖြစ်သွားတာမျိုး မရှိပါဘူး။ သူ့ရဲ့ အဆက်အစပ်မဲ့တဲ့ ကဗျာ(အင်္ဂလိပ်လို) စာသားတွေ ကိုက
သူတို့ လူ့အဖွဲ့အစည်းထဲက ဖြစ်ရှိမှုကို ထင်ဟပ်နိုင်တဲ့ (သူတို့ လူ့အဖွဲ့အစည်းလို့
ခွဲခြား ပြောရတာက ကျွန်တော်တို့ လူ့အဖွဲ့အစည်း အတွင်းက သိမှတ်နားလည်မှုနဲ့
လုံးဝဆက်စပ် နားလည်ခံစားကြည့်ဖို့ မဖြစ်နိုင်တဲ့ ကဗျာ အလုပ်လုပ်ပုံတွေ
တွေ့ရလို့ပဲ) ကဗျာ ဖြစ်မြောက်မှု ကဗျာဓာတ်တစ်ခုခုကို ထုတ်လုပ်နေသလို စရေးဖွဲ့ကတည်းက
ကဗျာတစ်ပုဒ်ချင်းအလိုက် စေ့စေပ်သေချာစွာ ဆင်ခြင်တုံတရားရှိစွာ စီရင်ထားတဲ့
တက္ကနိပိုင်းကိုပါ သတိပြုခံစားမိနိုင်ပါတယ်”
“တီဗီဖန်သားပြင်ကြီး ဖွင့်လျှက်”ထဲက ကဗျာတွေဟာ
နားလည်ရခက်ခဲစေအောင် စကားလုံး ဆော့ကစား ထားမှုတွေ၊ ပုံသဏ္ဌာန် ဆိုင်ရာ
အဆန်းအပြားပြုလုပ်မှုတွေ မပါရှိဘဲ ကဗျာစာသားလိုင်းဖြတ်ပုံ၊ ကဗျာဖတ်သူကို မေးခွန်း
ထုတ်ပုံ၊ ကဗျာနဲ့ ကဗျာဖတ်သူကို အတူတကွပူးတွဲတည်ရှိနေအောင် ရေးဖွဲ့ထားပုံ၊
ကဗျာထဲမှာ ကဗျာဖတ်သူကိုပါ ဝင်ရောက်ပတ်သက်ခွင့် ပေးထားပုံနဲ့ ခေတ်ပေါ်ကဗျာနဲ့ ကွဲပြားခြားနားတဲ့
ကဗျာဖွဲ့စည်းပုံမျိုးတွေကို သိသိသာသာ မြင်တွေ့ခဲ့ရပါတယ်။ နားလည်ခြင်း နားမလည်ခြင်း
ဆိုတာကတော့ ကဗျာဖတ်သူရဲ့ အတွေ့အကြုံ၊ ကဗျာဖတ်ကျင့်နဲ့ ကဗျာနဲ့ ဖတ်သူအကွာအဝေး
စတာတွေအပေါ်မှာ မူတည်တဲ့အတွက် နားလည်ရ လွယ်ခြင်း၊ မလွယ်ခြင်းဟာ တီဗီ ဖန်သားပြင်ကြီးနဲ့
တိုက်ရိုက်သက်ဆိုင်မယ်လို့တော့ မထင်မိပါဘူး။ ပထမကဗျာ စာအုပ်မှာ မောင်ယုပိုင်အပေါ် လွှမ်းမိုးခဲ့တဲ့
ကော်လာ့ဂ်ျကတွေဟာ ဒုတိယကဗျာစာအုပ်မှာ စကားပြေကဗျာတွေအဖြစ် ပြောင်းလဲသွားပါတယ်။ ခေတ်ပေါ် ခေတ်ပြိုင် စပ်ကူးမတ်ကူးကာလတွေဖြစ်တဲ့
၂၀၀၇ ကနေ ၂၀၀၉ မှာ မောင်ယုပိုင်လက်တွေ့ခဲ့တဲ့ ကော်လာ့ဂ်ျကဗျာတွေဟာ
စကားပြေကဗျာတွေအဖြစ် ပြောင်းလဲသွားတဲ့အပြင် ၂၀၁၃၊ ဇန်နဝါရီမှာတော့ စကားပြောကဗျာ စာအုပ်ထွက်ဖို့
ဖြစ်ပေါ် လာတဲ့အထိ မောင်ယုပိုင်အပေါ် စကားပြေကဗျာပြုလုပ်ဖန်တီးမှုတွေက
လွှမ်းမိုးခဲ့တယ်လို့ ပြောရ မလားပါပဲ။
၂၀၀၉၊ သြဂုတ်လဆီက ဆရာ ဇေယျာလင်းရဲ့
“တကယ့်ဘဝ” စကားပြေကဗျာများ စာအုပ်ထွက်လာတော့ ကဗျာရေးသူ၊ ဖတ်သူတော်တော်များများ
ရှော့ခ်ရသွားခဲ့မလားတော့ မသိပါဘူး။ ကျွန်တော်သိရ ကြားရသလောက်တော့ စကားပြေကဗျာနဲ့
မရင်းနှီးအသားမကျသေးတဲ့သူတွေ တော်တော်များများကတော့ ဒါကဗျာမဟုတ်ပါဘူးလို့
စွပ်စွဲခဲ့တဲ့အထိ အသံထွက်ခဲ့ပါတယ်။ အဲဒီလို ကဗျာမဟုတ်ဘူးဆိုတော့ စကားပြေလားလို့
ပြန်မေးကြည့်တော့လည်း စကားပြေလောက် ထိလည်း မပြေပြစ်တာကို တွေ့ရပါတယ်။
ကဗျာဖတ်သူအများစုဟာ Prose Poem နဲ့ ထိပ်တိုက်ရင်ဆိုင်လိုက်ရတဲ့အခါ အငိုက်မိသလို
ဖြစ်သွားပြီး ဘာပြန်ပြောရမှန်းမသိဘဲ ငြင်းဆန်ရမှာလိုလို၊ လက်ခံရမှာလိုလိုနဲ့
သို့လော သို့လော ဖြစ်ခဲ့ ပါတယ်။ ၂၀၁၃၊ ဇန်နဝါရီမှာတော့ ကဗျာဖတ်သူတစ်ချို့ဟာ
စကားပြေကဗျာတွေနဲ့ အသားကျစပြုနေပြီ။ စကားပြေကဗျာ ဖတ်ကျင့်ရနေပြီလို့
ပြောရမလားပါပဲ။ ဒါပေမယ့် လူများစုမဟုတ်ဘဲ လူနည်းစုသာဖြစ်တဲ့အတွက် မောင်ယုပိုင်ရဲ့
ရှေ့က ကဗျာစာအုပ် နှစ်အုပ်လောက် အသံမထွက်ခဲ့ဘူးလို့ ပြောရမယ် ထင်ပါတယ်။
ပွင့်ပွင့်လင်းလင်း ဝန်ခံရရင် ကျွန်တော်ကိုယ်တိုင်လည်း ဖတ်စက တော်တော် အီလည်လည်
ဖြစ်ရပါတယ်။ ကဗျာစာအုပ်တစ်အုပ်လုံးကို မဆိုထားနဲ့။ ကဗျာတစ်ပုဒ် ပြီးဆုံးအောင်၊
ကဗျာလိုင်းတွေ ကျော်မသွားအောင်ကို သေချာ အားစိုက်ဖတ်ရပါတယ်။ ပထမဆုံး ကဗျာလို့ သိထားတဲ့
လိုင်းစီပုံနဲ့ စကားပြေပုံစံ လိုင်းစီဟန် အကွဲအပြားမှာ ကဗျာလို့သိစိတ်နဲ့
ဖတ်နေရင်း စကားပြေတစ်ပုဒ်လို ဖြစ်သွားလိုက်၊ စကားပြေတစ်ပုဒ်လို ဖတ်နေရင်းနဲ့
ကဗျာအခြေပြုစကားလုံးအသုံးအနှုန်းနဲ့ စာသားပိုင်းဖြတ်ပုံ စတာတွေမှာ
ကဗျာအဖြစ်ပြန်ရောက်သွားလိုက်နဲ့ တော်တော်အားစိုက်ထုတ်ရပါတယ်။ စာသားတွေ ပြည့်သိပ်နေတဲ့
ကဗျာ အစုအဝေး ကြီး တစ်ခုကို ချက်ချင်းကဗျာအဖြစ်လက်မခံချင်တာက တစ်ပိုင်း၊
စကားပြေကဗျာနဲ့ ရင်းနှီးစပြုလာတာ မှန်ပေမယ့် ကဗျာစာအုပ်တစ်အုပ်အဖြစ်
စုစည်းလိုက်တဲ့အခါမှာ အိုင်သွားလေ့ရှိတာက တစ်ပိုင်း။ အဲဒီလိုနဲ့ တော်တော်လေး
ဖတ်ယူခဲ့ရ ပါတယ်။
မောင်ယုပိုင်ဟာ ခေတ်ပေါ်ကနေ
ခေတ်ပြိုင်ကာလအကြားမှာ တောက်လျှောက် စမ်းသပ်ကဗျာတွေ၊ ဟိုက်ဘရစ် ကဗျာ တွေ၊
အယ်လ်ပီနွယ်တဲ့ ကဗျာတွေ၊ ပို့စ်မော်ဒန်အခြေပြုကဗျာတွေ ရေးဖွဲ့လာပြီးတဲ့နောက် ၂၀၁၃
မှာတော့ ကဗျာကို စကားပြေ နယ်ပယ်ထဲအထိ တိုးဝင်ဖြန့်ကျက်ရေးဖွဲ့လာပါတော့တယ်။
ကဗျာတစ်ပုဒ်ကို စကားပြေဖွဲ့စည်းမှုအလှနဲ့ ဖုံးအုပ် သိုဝှက်ပြီး ကဗျာဖတ်သူ၊
စကားပြေဖတ်သူကို ပြန်ရှာခိုင်းပါတယ်။ စကားပြေထဲမှာ ကဗျာရဲ့ အသံကိုထည့်ဖွက်ပြီး
ကဗျာဖတ်သူကို နားထောင်ခိုင်းပါတယ်။ ခေတ်ပေါ်တုန်းဆီက ကဗျာအလှဓာတ်နဲ့ စမ်းသပ်ကဗျာ၊
ဟိုက်ဘရစ် ကဗျာတွေ ဆီမှာ အသုံးပြုခဲ့တဲ့ ကဗျာနည်းနာတက္ကနိတွေဟာ စကားပြေကဗျာရဲ့ ရိုးစင်းပြေပြစ်သော အလှဓာတ်အောက်မှာ သိုသိပ် ဝှက်ကွယ်စွာ
လိုက်ပါပြီး စကားပြေကဗျာဖတ်သူကို ကျီစယ်လန့်နိုးလိုက်ပါတယ်။ ဘယ်လို အကြောင်းအရာလဲ။
ဘယ်လို တင်ပြမလဲ။ ဘယ်လိုကွယ်ဝှက်ထားမလဲ။ ဘယ်လို သဲလွန်စချန်ပေးမလဲ ဆိုတာတွေဟာ
စကားပြေ ကဗျာရဲ့ အသက်ပါပဲ။
“ ရိုးရှင်းပါတယ်။ ဘဝဟာ ရိုးရှင်းစွာ နေထိုင်ရပါတယ်။
ရိုးရှင်းတဲ့ ဘဝမှာ နေထိုင်ပါတယ်။ ပြာလွင်လွင် ကောင်းကင်ကြီးအောက်မှာ
ကွင်းပြင်ကျယ်နေရာလွတ်ကြီးတစ်ခုနဲ့ ဘဝဟာ ပြောင်သလင်းခါ၊ လေယူရာ ယိမ်းပါ လောက်အောင်
ပေါ့ပေါ့ပါးပါးပေါ့။ ဘဝမှာ ရိုးတယ်မဟုတ်လား။ ရိုးရိုးပဲ။ တောသူတောင်သားများ သဘာဝ၊
ကမ်းထရီး စတိုင်လ်လို့လည်း ခေါ်နိုင်၊ ဂနိုင်ကျကျလည်း ပြောလို့ရ၊ ရှယ် မဟုတ်ဘူး။
နေရာက နယ်လို့ ခေါ်မယ်ဆိုလည်း ခေါ်နိုင် ပါတယ်။ ရှင်းပါတယ်။ ဒီဘဝကိုပဲကြည့် ၊
မွန်းတည့်မှ အိပ်ရာက ထ၊ တဝတပြဲစား၊ တရေးတမောပြန်အိပ်၊ စာအုပ်ကလေးတွေ
ကိုယ်တိုင်ထိုင်ချုပ်၊ ပလတ်စတစ်အဖုံးတပ်၊ ရေမချိုးခင် ဒိုက်အကြိမ် နှစ်ဆယ်ထိုး၊
ကာ့ဖ်ကာထဲက လူပျိုကြီးလို အားအားရှိတိုင်း နဖူးကို လက်ဖဝါးနဲ့ ရိုက်နေရုံပဲပေါ့။
နောက်ပြီးတော့ သွေးအယားဖြေ၊ ပြီးတော့ သွေးသားအယားဖြေ၊ ပြီးတော့မှ ဘယ်တိုက်ကို
စာမူပို့ရမလဲစဉ်းစား”
( ဘဝထက်
ရှင်းတာတောင် ဘဝလောက် မရှင်းဘူး ကဗျာမှ/ စကားပြောကဗျာ စာအုပ်)
“ ရန်ကုန် စရောက်တဲ့နေ့ကလိုပဲ ၊ ရှော့ခ်အကြီးကြီးနဲ့
မြို့ထဲ ဝင်လာတယ်။ ရုတ်တရက် တိတ်ဆိတ်၊ အဆောက်အဦတွေ ရုတ်ချည်းနိမ့်ဆင်း၊
ခြောက်ကပ်သွားသယောင်နဲ့ ဟွန်ဒါဆိုင်ကယ်တွေကျတော့ အံ့ဖွယ်သဘောကျစရာ ပလူပျံ၊ ငါ့ကို
တင်ခေါ် သွားဖို့အသင့်။ လူကတော့ လူသားတစ်ယောက် ဟိုမှာ ခွေးလေခွေးလွင့်ဖြစ်ခဲ့တဲ့
ငါဆိုတဲ့ လူသားတန်ဖိုးတစ်ယောက်ကတော့ ချက်ချင်းပဲ ကြီးထွား၊ တဖန်ပြန်
ရှင်သန်ထမြောက်၊ ငါ့ကိုယ် ငါ အခုမှ ပြန်တွေ့။ ငါ့ ‘ ကျေးဇူးကြီးပေ တို့ဖေဖေ’ ကို
ငါ အခုမှ (စာတွေ့မဟုတ်ဘဲ) လူတွေ့ ပြန်တွေ့၊ ငါ့ ‘ အမေ့အိမ်’ ကို သူမရဲ့ အရင်လို
လောဘရှေ့ထားလျက် အဆိုးမြင် အပြစ်တင် ရေရွတ်သံများကြားက ပြန်တွေ့။
နားပူတာလောက်တော့ ‘သား’ ပျော်ပျော်ကြီးခံနိုင်သွားပြီ၊ ဟိုမှာ မတရား
ကျောပူခဲ့တာကိုး၊ ဒီမှာ ဆိုက်ကားဆရာအဆုံး ပေါ့ပါးပြုံးပျော်လျှက်။
သိပ်အဆင်မပြေဘူးဗျကို လက်ဖက်ရည်ဆိုင်မှာ
စီးကရက်လေးခဲပြီး အေးအေးလူလူ ညည်းညူလျှက်။”
(မြိတ်ပြန်ရောက်ပြီး
သုံးနာရီ ကဗျာမှ/ စကားပြေကဗျာ ကဗျာစာအုပ်)
မောင်ယုပိုင်ဟာ ဒီလောက်နဲ့
ရပ်မနေပါဘူး။ ကဗျာကို သူဘယ်လို ချဲ့ထွင်ရမလဲဆိုတာ အမြဲစဉ်းစားနေတဲ့ ကဗျာဆရာ
တစ်ယောက်ပါ။ ၂၀၁၄၊ ဒီဇင်ဘာမှာ နေဝိုင်ဝိုင်၊ လင်းဇင်ယော်၊ နိုင်ဝေတို့နဲ့အတူ
“ပင်လယ်စာ” ကဗျာစာအုပ်၊ ၂၀၁၅၊ ဖေဖော်ဝါရီမှာ မောင်ယုပိုင် + ကဗျာဆရာ ၄၄ ယောက်နဲ့
နှစ်ယောက်တွဲကဗျာ (၄၀)၊ သုံးယောက်တွဲကဗျာ (၂)ပုဒ် ပါဝင်တဲ့ Double Poetry Project
ကဗျာစာအုပ် ဆက်လက်ထွက်ရှိခဲ့ပါတယ်။ ဒီလိုနှစ်ယောက်တွဲ၊ သုံးယောက်တွဲ ကဗျာတွေ
ခေတ်ပေါ်ကဗျာ ခေတ်ဦး ကတည်းက ရှိခဲ့ပေမယ့် ဒီနေ့လို ခေတ်ကြီးထဲမှာ ပိုမိုလွယ်ကူစွာ၊
ပိုမိုလွတ်လပ်စွာ၊ ပိုမို စုပေါင်းရေးဖွဲ့လာကြပါတယ်။ အဲဒီလို စုပေါင်း
ရေးဖွဲ့တဲ့ကဗျာတွေထဲမှာ မန္တလေးလူငယ်ကဗျာဆရာ (၁၀)ဦးစုထုတ်တဲ့ “ ဒါကဗျာလား ဒါလား
ကဗျာ” ကဗျာစာအုပ်နဲ့ မောင်ယုပိုင် တို့ရဲ့
“Double Poetry Project” ကဗျာစာအုပ်တို့ဟာ ထင်ရှားပါတယ်။ တစ်ခုကွဲပြားတာက “
ဒါကဗျာလား ဒါလား ကဗျာ” ကဗျာ စာအုပ်ထဲက စုပေါင်းကဗျာတွေဟာ လက်ဖက်ရည်ဆိုင် စားပွဲဝိုင်းတစ်ခုမှာ
တွေ့ဆုံပြီး တစ်လှည့်စီရေးဖြစ်တဲ့ ကဗျာ တွေ များပေမယ့် DPP ကိုတော့ မောင်ယုပိုင်က ဦးဆောင်ပြီး Close
Group တစ်ခုဖွင့်၊ ကိုယ်ရွေးချယ်ထားတဲ့ လူငယ်ကဗျာဆရာ တွေနဲ့ တစ်ယောက်စီကို
နှစ်ယောက်တွဲကဗျာတစ်ပုဒ်ရေး၊ သမ္ဘာရင့်ကဗျာဆရာများဆီက ခေါင်းစဉ်တောင်းပြီး
အွန်လိုင်းဂရုပေါ် မှာတင် အဆုံးသတ် ရေးဖွဲ့ထားတဲ့ ကဗျာတွေပဲ ဖြစ်ပါတယ်။
ကဗျာတစ်ပုဒ်ဟာ ကဗျာဆရာနှစ်ယောက်ဆီက လာတဲ့ မတူညီတဲ့ အတွေး၊ မတူညီတဲ့
စကားလုံးတည်ဆောက်ပုံ၊ မတူညီတဲ့ရေးဟန်တွေနဲ့ အချိုးကျကျ ကဗျာမြောက်သွားအောင်
ဖန်တီးဖို့ဆိုတာ လွယ်ကူတဲ့အရာမဟုတ်ပါဘူး။ အကယ်၍ ကဗျာမြောက်လှတဲ့ကဗျာတစ်ပုဒ်အဖြစ် ရောက်ရှိ
သွားပြီ ဆိုရင်လည်း မတူညီတဲ့ အလှတရားကိုယ်စီနဲ့ နောက်ထပ်အလှတရားအသစ်တစ်ခုကို
ရရှိလိုက်တာမို့ ထူးခြားဆန်းသစ်တဲ့ ကဗျာတစ်ပုဒ် အဖြစ် ရှင်သန်ကျန်ရစ်မှာပဲ
ဖြစ်ပါတယ်။ DPP ဟာ အောင်မြင်တဲ့ တွဲဖက်မှုတစ်ခုလို့ပဲ ဆိုလိုက်ပါရစေ။ ကဗျာတွေ
ကောက်နှုတ်ပြတာထက် ကဗျာစာအုပ်တစ်အုပ် အမြန်ပြေးဝယ်လိုက်တာ ပိုကောင်းမယ်လို့ပဲ
အကြံပြုချင်ပါတယ်။ မကြာခင်မှာ ဒရာမာ ဇာတ်လမ်းတွဲ
လာတော့မယ်လေ။
မေလ၊ ၂၀၁၆ ရဲ့
ပြီးခဲ့တဲ့ ရက်ပိုင်းလေးမှာပဲ ကဗျာဆရာ မောင်ယုပိုင်ရဲ့ ဒရာမာ ကဗျာစာအုပ်
နှင်းဆီဖြူ စာအုပ်တိုက်ကနေ ထွက်ရှိလာပါတယ်။ ဒရမ်မာကဗျာတွဲအဖြစ် ၁ ကနေ ၇၀ အထိ
ထည့်သွင်းဖော်ပြထားပါတယ်။ ဒီကဗျာ စာအုပ်ထဲက တစ်ချို့ကဗျာတွေကိုတော့
အွန်လိုင်းဖေ့ဘွတ်ခ်စာမျက်နှာပေါ်မှာ မောင်ယုပိုင်ရေးတင်နေကတည်းက ဖတ်ပြီး သား
ဖြစ်နေပေမယ့် အစဉ်လိုက်တော့ မဟုတ်ခဲ့ဘူး။ အခု ၁ ကနေ ၇၀ အထိ အစဉ်လိုက် တစုတစည်းတည်း
ပြန်ဖတ် လိုက်ရတော့ ကဗျာတွေဟာ အသစ်တဖန်ပြန်မွေးဖွားလာသလို လတ်ဆတ်သစ်လွင်နေတဲ့အပြင်
ဘဝအသစ်တစ်ခု တည် ဆောက်မှု၊ မိသားစုတစ်စုအစပြုမှု၊ အိမ်ထောင်သည်ဘဝဖြတ်သန်းမှု
စတာတွေအပြင် မိသားစုဘဝ၊ အိမ်ထောင်သည် တစ်ယောက်ရဲ့ လောကအမြင်၊ ဘဝနေနည်း တွေကိုပါ
ကဗျာထဲမှာ ပါးပါးလှပ်လှပ်ကလေး ထည့်ပြသွားတာတွေကို သတိထားမိလိုက်ပါတယ်။
“လက်ထက်ပွဲ
ခန်းမငှားဖုိ့ ကြိုတင်စာရင်းပေးသွင်းရတယ်
စာရေးမလေးက
ငါ့နာမည်မေးပြီး သူ့ဘေးက ပြက္ခဒိန်ပေါ်မှာ
မင်နီနဲ့
တေးမှတ်လိုက်တယ်
သူ့အတွက်တော့
ကားလက်မှတ်ရောင်းသလောက်ပါပဲ
ကိုယ့်အတွက်က
ပြန်လမ်းမဲ့ ခရီး။”
(ဒရာမာ
၁)
“ နှစ်ယောက်သုံး ဗီရိုကြီးမှာ
သော့အိမ်ပျက်ချင်လာတယ်
မီးချောင်းတွေက
ဖျော့တော့လာ
ပြက္ခဒိန်ဟာ
မြန်ဆန်စွာပဲ ဟောင်းနွမ်းသွားတယ်
မင်္ဂလာဦးတုန်းက
ငါတို့ဝယ်ခဲ့တဲ့ ပရုပ်လုံးတွေ ကုန်ပြီပေါ့ကွာ
ဒါတွေဟာ
တခါတပ်ဆင်နေရာချထားရုံနဲ့ မပြီး
အကြိမ်ကြိမ်
ပြုရပြင်ရဦးမှာ ငါတို့မေ့လျော့ခဲ့ပုံ”
(ဒရာမာ ၁၆)
မနက်ကအထိ
ကလေးခေါင်းအုံးထွက်ဝယ်ဖို့ စဉ်းစားတုန်း
သူမ
တစ်နာရီအတွင်း ဆေးခန်းကုတင်ပေါ်ရောက်လာ
ခွဲစိတ်မီးဖွားဖို့
နှာခေါင်းပိုက်တန်းလန်းနဲ့ ထိုင်စောင့်ရင်းအတွေးထဲ
သွေးတွေ
တိုးဝင်လာ
ဘဝဟာ
ငါ့ဟမ်းဖုန်းပြက္ခဒိန်ထဲ ဆွဲထားတဲ့ ဇယားအတိုင်းမဟုတ်
အားလုံးပြင်ဆင်စုဆောင်းထားပြီးမှ
နီးရာလက်နက်ကိုင်စွဲရပြန်တဲ့ ချုံခိုတိုက်ခိုက်မှု
(ဒရာမာ
၆၂)
ဒရာမာ
အစကို ဖတ်ရင်းနဲ့ တစ်ပုဒ်ပြီး တစ်ပုဒ် လက်ကမချချင်တော့။ ဒရာမာ တွေဟာ
မောင်ယုပိုင်ရဲ့ နေ့စဉ် မှတ်တမ်းပဲ ဖြစ်တယ်။ မင်္ဂလာဆောင်ဖို့ ရက်ရွေး၊ ဖိတ်စာရွေး၊
အဝတ်အစားရွေး၊ မိတ်ကပ်ပြင်၊ မင်္ဂလာဆောင်၊ မင်္ဂလာဆောင်ပြီးတော့ နေရထိုင်ရ အသားမကျပုံ၊
ပျားရည်ဆမ်းခရီး၊ အိမ်ထောင်သည်ဘဝ ဆရာနဲ့တကွ နည်းလမ်းတကျ ဖြစ်ချင်ပုံ၊
လင်နဲ့မယားလျှာနဲ့သွားဖြစ်ရပုံ၊ အဆင်မပြေမှုများ၊ ဒီလိုနဲ့ ကိုယ်ဝန်ရှိလာပုံ၊
သားတစ်ယောက်ဘဝကနေ မိဘ ဘဝစတင်အကူးအပြောင်းကာလ။ ကျွန်တော်ဟာ ဒရမ်မာဇာတ်လမ်းတွဲက
တစ်နေ့တည်း တစ်ထိုင်တည်း ကြည့်ပစ်လိုက် မိပါတယ်။ မောင်ယုပိုင်ရဲ့
ကဗျာတည်ဆောက်မှုမှာ အဲဒီကျွန်းမြို့လေးကနေ အခုစာအုပ် ဒရာမာ အထိ ကဗျာဆိုင်ရာ
စာအုပ်တွေပြီးရင် နိုင်ငံခြားရုပ်ရှင်ဇာတ်ကားတွေဟာ သူ့အပေါ်
အများဆုံးလွှမ်းမိုးနေရာယူထားပါတယ်။ သူ့ကဗျာစာအုပ် တိုင်းမှာ တီဗီဖန်သားပြင်တွေ၊
တီဗီချယ်နယ်တွေ၊ ရုပ်ရှင်ဇာတ်လမ်းတွေဟာ သိသိသာသာ ပါဝင်ပတ်သက်နေလေ့ ရှိပါတယ်။ ဒါဟာ
ကဗျာနည်းနာတွေ၊ မော်ဒန်၊ ပို့စ်မော်ဒန်တွေနဲ့ မဆိုင်ဘဲ ကဗျာတည်ဆောက်မှု၊
ကဗျာပြုလုပ်မှုမှာ ကဗျာဆရာအပေါ် လွှမ်းမိုးလေ့ရှိတဲ့ ပြင်ပရိုက်ခတ်မှုတစ်ခုကို
ပြောတာပဲဖြစ်တယ်။ အခု ဒရာမာ ဇာတ်လမ်းတွေကျတော့ မောင်ယုပိုင်ဟာ သူ့ဘဝတစ်ခုလုံးကို
တီဗီဖန်သားပြင်ကြီးထဲ ဆွဲသွင်းလိုက်တယ်။ သူဖြတ်သန်းခဲ့တဲ့ အိမ်ထောင်သည်ဘဝ နေ့ရက်တွေဟာ
ဒရာမာ ဇာတ်လမ်းတွဲတွေအဖြစ် တစ်ပိုင်းပြီး တစ်ပိုင်း တင်ဆက်ပြသလာခဲ့တယ်။ ဒရာမာ ၄၈၊ ဒရာမာ
၅၀၊ ဒရာမာ ၅၂၊ ဒရာမာ ၆ဝ၊ ၆၁ တဖြည်းဖြည်း ဇာတ်ရှိန်မြင့်သွား၊
ရုပ်ရှင်ဇာတ်လမ်းတစ်ခုမှာဆိုရင် ဇာတ်ရှိန် အမြင့်ဆုံးအခန်း( Climax Sence) တွေဖြစ်မယ့်
ဒရာမာ ၆၈၊ ဒရာမာ ၆၉၊ ဒရာမာ ၇၀ (Track 1)၊ ဒရာမာ ၇၀ (Track 2)။ အားလုံးပြီးမှ
အသက်ကို ဝဝပြန်ရှူရတယ်။ ဒရာမာ ဟာ ဒရာမာ ဆိုတဲ့အတိုင်း ကြည်နူးမှု၊ ဝမ်းနည်းမှု၊
စိတ်ပျက် အားငယ်မှု၊ အလိုမကျမှု၊ ပျော်ရွှင်မှုတွေနဲ့ တခန်းပြီး တခန်း၊
ဇာတ်လမ်းတစ်ပိုင်းပြီး တစ်ပိုင်း ကဗျာဖတ်သူကို အရသာရှိရှိ ထိုင်ရာမထစေဘဲ
ဆွဲဆောင်သွားနိုင်ပါလိမ့်မယ်။ ကျွန်တော်တို့ နေ့စဉ်ကြည့်နေရတဲ့ Super Hero တွေ၊
Avengers တွေ၊ Political Corruption တွေကြားထဲမှာတော့ ဒရာမာ ဟာ အောင်မြင်တဲ့ဇာတ်လမ်းတွဲ၊
နှစ်သက်ဖွယ်ကောင်းတဲ့ ကဗျာစီးရီး တစ်ခုပါပဲ။ မောင်ယုပိုင်ဟာ
အရိုးရှင်းဆုံးအရေးအသားနဲ့၊ သူကျွမ်းကျင်ပိုင်နိုင်တဲ့ စကားပြေကဗျာဆန်တဲ့
အဖွဲ့တွေနဲ့၊ သူ့အပေါ်လွှမ်းမိုးထားတဲ့ ပြင်ပရိုက်ခတ်မှုက အတွေ့အကြုံတွေနဲ့၊ သူ့ရဲ့
ရင့်ကျင်မှုတွေ၊ သူရဲရင့်ခဲ့ပုံတွေ၊ သူရင်ဆိုင်ခဲ့ပုံ တွေကို ဒရာမာမှာ
ပုံအောခဲ့ပါတယ်။ ဒရာမာ အောင်မြင်ပါစေ။ မောင်ယုပိုင်လည်း နေ့ရက်တိုင်းမှာ
ပိုမိုပျော်ရွှင်စရာ ကောင်းတဲ့ မိသားစု ဘဝလေးကို တည်ဆောက်နိုင်ပါစေလို့
ဆုတောင်းပေးလိုက်ပါတယ်။
မင်းနဒီခ
၂၆၊ ၅၊ ၂၀၁၆
No comments:
Post a Comment