Friday, June 9, 2017

အမှတ်တရ နေ့များ

အမှတ်တရ နေ့များ

တစ်ယောက်လက် တစ်ယောက်တွဲစေ
တစ်ယောက်အိပ်မက် တစ်ယောက်မက်စေ
တစ်ယောက်ဖန်ပြာခွက်မှာ
တစ်ယောက်က ကျောက်စက်ရေဖြစ်ပြီး
တစ်ယောက်အနမ်းမှာ တစ်ယောက် လန်းဆန်းစေ
တစ်ယောက်မိုးရာသီမှာ တစ်ယောက်က အမိုးအကာဖြစ်ပြီး
တစ်ယောက်ဆောင်းရာသီမှာ တစ်ယောက်က မီးလင်းဖိုဖြစ်စေ
တစ်ယောက်ဝမ်းနည်းမှုမှာ တစ်ယောက်က အားပေးစကားဖြစ်ပြီး
တစ်ယောက်ပျော်ရွှင်မှုမှာ တစ်ယောက်က လက်ခုပ်သံဖြစ်စေ
အဲဒီလို ဆုတောင်းများနဲ့ တစ်ယောက်ကို တစ်ယောက်
နှစ်နှစ်ခြိုက်ခြိုက် ချည်နှောင်ခဲ့တဲ့ ရက်များ
ရက်ပေါင်း ၂၄၄ ရက်
နာရီပေါင်း ၅၈၅၆ နာရီ
မိနစ်ပေါင်း ၃၅၁၃၆၀ မိနစ်
စက္ကန့်ပေါင်း ၂၁၀၈၁၆၀၀ စက္ကန့်
တစ်ယောက်ကို တစ်ယောက်
ငါတို့ ချစ်ခဲ့တဲ့ ချစ်ခြင်းကို ဘယ်လို ရေတွက်ရမလဲ
တစ်ယောက်ကို တစ်ယောက်
ငါတို့ ပေးခဲ့တဲ့ အကြင်နာတရားကို ဘယ်လို ရေတွက်ရမလဲ
တစ်ယောက်ကို တစ်ယောက်
ငါတို့ ထားရှိတဲ့ မေတ္တာတရားကို ဘယ်လို ရေတွက်ရမလဲ
ဘယ်လိုဖြစ်ဖြစ် တိုင်းတာလို့ရရင်
ငါပေးခဲ့တဲ့ အရေအတွက်ထက်
ငါပြန်ရခဲ့တဲ့ အရေအတွက်က များခဲ့တယ်ဆိုတာ
ယုံတယ်။

မင်းနဒီခ

၃၊ ၁၂၊ ၂၀၀၉

No comments:

Post a Comment