ပင်လယ်နှင့် မိတ်ဆက်ခြင်း - သစ္စာနီ
စာအုပ်အမည် - ပိုးသားရောင်ပင်လယ်လမ်း
ရေးသူ - မင်းနဒီခ
ထုတ်ဝေသည့်တိုက် -ကြယ်နီ
ထုတ်ဝေသည့်ကာလ - မတ်လ၊ ၂၀၁၂
တန်ဖိုး - ၁၅၀၀ ကျပ်
(၁)
ကဗျာစာအုပ်လေးတွေအကြောင်း ကျွန်တော်ရေးတဲ့အခါ ကရုဏာထားတဲ့ အချက်တစ်ချို့ ရှိပါတယ်။ (၁) အဲဒီကဗျာဆရာဟာ မြန်မာကဗျာလောကမှာ အသိအမှတ်( အများက) အပြုခံရတဲ့သူ။ ဒါမှမဟုတ် ( ကျွန်တော့် အမြင်) အပြုခံထိုက်တဲ့သူ ဖြစ်ရပါမယ်။ အဲဒါဆို ကျွန်တော်ရေးစရာ ကဗျာဆရာတွေ အများကြီး ကျန်နေသေးတာ သတိပြုမိလိမ့်ကြမယ် ထင်ပါတယ်။ (ဥပမာ- ခရမ်းပြာထက်လူ၊ ခိုင်မြဲကျော်စွာ၊ မင်းဆွေနှစ် စသဖြင့်ပေါ့လေ)။ တစ်ဦးကို တစ်ကြိမ်ပဲရေးမှ အပတ်လည်မယ်လို့ ကျွန်တော်က ဆုံးဖြတ်ထားတယ်။ တစ်ချို့ ရေးစရာ ကဗျာဆရာတွေ ကျန်နေသေးတဲ့တိုင်အောင် တစ်ချို့ ကဗျာဆရာဆရာတွေဟာ တစ်ကြိမ် ရေးပြီးပေမယ့် နောက်တစ်ကြိမ် ပြန်ရေးဖို့ လိုအပ်လာနေတယ်ဆိုတာ တွေ့ရတယ်။ ( ဥပမာ- ဇေယျာလင်း ၊ စိုင်းဝင်းမြင့် စသဖြင့်) တစ်ချို့သော ကဗျာဆရာတွေ ( အများအားဖြင့် ကျွန်တော်နဲ့ ခေတ်ပြိုင်အချို့ ဥပမာ - အောင်ချိမ့်၊ သုခမိန်လှိုင်၊ မောင်ချောနွယ် တို့ရဲ့ ) ကဗျာစာအုပ်တွေကို မရေးဘဲ တမင်ချန်လှပ်ထားခဲ့တယ်။ ဒါကလည်း အကြောင်းတွေ ရှိပါတယ်။ အကောင်းပြောရရင် အချင်းချင်းမြှောက်နေတယ်လို့ ထင်မယ်။ မကောင်းတာပြောရရင် သူ့ထက်မသာအောင် နှိပ်ကွပ်နေတယ်လို့ ထင်မယ်။
နောက် ကျွန်တော်သတိထားပြီး လုပ်ဆောင်နေတာ တစ်ခုရှိပါတယ်။ လူငယ်ကဗျာဆရာကလေးတွေရဲ့ စာအုပ်တွေကို ရွေးချယ်တင်ဆက်နေတာပါပဲ။ ဒါက အခုမှ ကဗျာလောကထဲ ၀င်လာတဲ့ လူငယ်တွေကို ကဗျာဖတ်ပရိသတ်နဲ့ မိတ်ဆက်လမ်းကြောင်းပေးတဲ့ သဘောပါပဲ။ ဒီအလုပ်ကို ကျွန်တော်အပေါ်စီးက လုပ်နေတာ မဟုတ်ဘူး။ ကျွန်တော် ရှေ့က ရေးခဲ့တဲ့ ကဗျာဆရာ တော်တော်များများဟာ ကျွန်တော် ဂုဏ်တင် ပေးစရာမလိုအောင် သူတို့ဘာသာ အခိုင်အမာတည်ဆောက်ထားနိုင်တဲ့သူတွေ ဖြစ်ပါတယ်။ ကျွန်တော်က တစ်နေ့ အသုံးဝင်လို ၀င်ငြား မှတ်တမ်းမှတ်ရာ ပြုစုပေးတဲ့ အဆင့်ထက် ဘာမှ မပိုပါဘူး။ အခုတစ်ပတ်တော့ လူသစ်တစ်ဦးဖြစ်တဲ့ မင်းနဒီခရဲ့ ကဗျာစာအုပ်နဲ့ မိတ်ဆက်ပေးလိုက်ပါတယ်။
(၂)
ရှေ့ မှာ အမှာစာ ရေးထားသူ နှစ်ယောက်၊ မောင်ကြည်သာ ( တောင်တွင်း) နဲ့ နေမျိုး တို့ရဲ့ အမှာစာတွေနဲ့ သူကိုယ်တိုင်ရေးထားတဲ့ ပင်လယ်များကို ဖြတ်သန်းခြင်း ( ပိတောက်ပွင့်သစ်) ဆိုတာတွေ ဖတ်ကြည့်ရုံနဲ့ မင်းနဒီခရဲ့ ကဗျာဘ၀နဲ့ ကဗျာတွေအကြောင်း အတော်အတန် သဘောပေါက် နားလည်နိုင် ပါလိမ့်မယ်။ အဲဒီစာအုပ် ပူးတွဲပါတဲ့ စာသုံးပုဒ်ဟာ သူ့ကဗျာဖတ်တဲ့သူကို အကြီးအကျယ် အထောက်အပံ့ ပေးပါလိမ့်မယ်။ ဒါမှမဟုတ်လည်း အကြီးအကျယ် စိတ်အနှောက်အယှက်လည်း ပေးနိုင်ပါတယ်။ ကဗျာမဖတ်ခင် ကဗျာဖတ်သူရဲ့ အာရုံငါးပါးကို ကြိုတင်ပြဌာန်းနိုင်တဲ့ အခြေအနေရှိလို့ပါပဲ။
ဒီစာအုပ်ထဲမှာ မင်းနဒီခရေးတဲ့ ၂၀၀၆ ခုနှစ်ကနေ ၂၀၁၁ အတွင်းရေးခဲ့တဲ့ ကဗျာတွေ ပါပါတယ်။ တစ်ချို့ကဗျာတွေနောက်မှာ ပြီးခဲ့တဲ့ နှစ်ကာလရော ဖော်ပြခံရတဲ့ မဂ္ဂဇင်းရော မပါပါဘူး။ သူက သူ့စာထဲမှာ အထောက်အထားအရ အွန်လိုင်းသုံးပုံရပြီး အွန်လိုင်းပေါ်မှာ ရေးခဲ့တဲ့ ကဗျာတွေ ဖြစ်နိုင်ပါတယ်။ ဘာကိုမှ မငဲ့တဲ့ စိတ်နဲ့ လွတ်လွတ်လပ်လပ်ရေးခဲ့လို့လားမသိ။ မဂ္ဂဇင်းထဲမှာ ပါတဲ့ ကဗျာတွေထက် ပိုကောင်းနေတာ တွေ့ရပါတယ်။
သူ့ရှေ့ပိုင်းကဗျာတွေကတော့ သာမန်မော်ဒန်လူငယ်ကဗျာဆရာတစ်ယောက်ရဲ့ စံချိန်စံနှုန်းအပြည့်နဲ့ပါ။ ဥပမာ - မိုး၊ ဆောင်ဓါး၊ ပင်လယ်၊ အကြောင်းတရားများ စသဖြင့်ပေါ့။ တာရာမင်းဝေရဲ့ ကဗျာအရိပ် နည်းနည်းလွှမ်းသလို ရှိပေမယ့် အဆင့်အတန်းရှိရှိ ခေတ်ပေါ်ကဗျာတွေ ဖြစ်ပါတယ်။ အပြစ်ပြောမယ်ဆိုရင် နည်းနည်းတိုနေတာပဲ ပြောစရာရှိတယ်။ သမ္ဘာရှိရှိနဲ့ ဆွဲဆန့်လိုက်မယ်ဆိုရင် ဒီထက်ကောင်းတဲ့ ကဗျာတွေ ဖြစ်လာမှာပါ။
မင်းနဒီခမှာ အားသာတဲ့ အချက်က သူဟာ ကဗျာအယူဝါဒရေးရာကို စိတ်ပါဝင်စားပြီး လေ့လာလိုက်စား တယ်ဆိုတာပါပဲ။ မြန်မာနိုင်ငံက ကဗျာရေးသူတော်တော်များများဟာ ( အထူးသဖြင့် ကျွန်တော်တို့နဲ့ ခေတ်ပြိုင်ပတ်ဝန်းကျင်လောက်က ကဗျာဆရာတွေ) ကဗျာဆရာရဲ့ အလုပ်က ကဗျာရေးဖို့သက်သက်ပဲလို့ ယုံကြည်ကြတယ်။ ကဗျာအယူအဆ၊ ကဗျာဝါဒ၊ ကဗျာသဘောတရားတွေကို လေ့လာလေ့မရှိဘူး။ အခုခေတ် လူငယ်ကဗျာဆရာတော်တော်များများကတော့ ဒီလိုလေ့လာရတာ ၀ါသနာပါပြီး ကဗျာနဲ့ ပတ်သက်တဲ့ အယူအဆဆိုင်ရာ ဆောင်းပါးတွေတောင် ရေးကြတယ်။ ( ဥပမာ - သူရနီ၊ အောင်ပိုင်စိုး၊ ဇော်လူစိမ်း၊ စေတ စသဖြင့်ပေါ့)။
နောက်တစ်ချက် သူကုသိုလ်ကောင်းတာက သူ့ဘေးမှာ သူ့ကို ဝေဖန်အကြံပေးနိုင်တဲ့ မောင်ကြည်သာ ( တောင်တွင်း)၊ နေမျိုး စတဲ့ သူတွေ ရှိနေတာပါပဲ။ ဒီစာအုပ်နောက်ပိုင်း ကဗျာတွေမှာ သူက ခေတ်ပေါ် လမ်းကြောင်းကနေ ခေတ်ပြိုင်ကဗျာလမ်းကြောင်းကို ပြတ်ပြတ်သားသား ကူးပြောင်းစ ပြုနေတာကို တွေ့ရ ပါတယ်။ စောစောပိုင်း ကဗျာတွေဟာ သူကိုယ်တိုင် စမ်းသပ်ဆဲကာလမို့ ခေတ်ပြိုင်ကဗျာလက္ခဏာတွေ သိပ်ပီပီပြင်ပြင် မရှိလှပေမယ့် နောက်ပိုင်း ကဗျာတစ်ချို့ မှာတော့ ပီပီပြင်ပြင်ရောက်နိုင်တာ တွေ့ရပါတယ်။ (ဥပမာ- ဘယ်လိုဖြည့်ဖြည့် မပြည့်ဘူးလား ကိုပြည့်၊ ကဗျာကို ဘယ်လိုရေး၊ ခင်ဗျားစီးနေတာ ဘယ်ရထားလဲ၊ အခြား အခြားသော အကြောင်းအရာများနှင့် အခြား၊ ငြိမ်သက်တစ်မိနစ် စသည့် ကဗျာများ၊) အဲဒီကဗျာတွေဟာ ခေတ်ပြိုင်ကဗျာကို စွဲလမ်းနှစ်ခြိုက်သူတွေ မငြင်းဆန်နိုင်တဲ့ ကဗျာမျိုးတွေ ဖြစ်ပါတယ်။ တခါတလေမှာတော့ သူ့ဆီမှာ စိုင်းဝင်းမြင့် သြဇာကို ရိုးတိုးရိပ်တိတ်မြင်လိုက်ရသလိုပါပဲ။
ပုဂ္ဂလိက ခံစားချက်ကို အလေးထားတဲ့ မိသားစုဘ၀ကဗျာလေးတွေလည်း သူဟာ ဖွဲ့ဆိုဖို့ မမေ့လျော့ခဲ့ပါဘူ။ ဥပမာ- သားသားလေးလား မီးမီး၊ ပိုးပိုး စတဲ့ ကဗျာနှစ်ပုဒ်ဟာ သူ့သမီးလေးအကြောင်းဖြစ်ပြီး မိသားစုကဖေးရဲ့ လွတ်နေသော ထိုင်ခုံလေးအကြောင်း ကဗျာကတော့ အိမ်ကထွက်သွားတဲ့ ညီငယ် တစ်ယောက် အပေါ် လွမ်းဆွတ်တသမိတဲ့ အကြောင်း ဖြစ်ပါတယ်။ ရင်ထဲက နက်နက်ရှိုင်းရှိုင်း ထွက်ပေါ်ဖိတ်လျှံ လာတဲ့ ခံစားချက်တွေကြောင့် ဒီကဗျာလေးတွေဟာ ရိုးရိုးစင်းစင်းနဲ့ ဆွဲဆောင်အား အင်မတန်ကောင်း နေပါ တယ်။ သူ့ကဗျာစာအုပ် သင့်လက်ထဲ ရောက်နေတယ်ဆိုရင် ...
(၁) အချပ်ပို
(၂) ဟယ်လို ဟယ်လို
(၃) အခုပြောနေတာ ဘယ်သူ့ဘာသာစကားလဲ
(၄)နာရီစားသူများ
(၅) မွေးနေ့ စတဲ့ ကဗျာတွေကိုလည်း မပျက်မကွက်ဖတ်ဖို့ တိုက်တွန်းလိုက်ပါတယ်။
သစ္စာနီ
စရဏမဂ္ဂဇင်း၊ စက်တင်ဘာ၊ ၂၀၁၂
No comments:
Post a Comment